Mikil lukka !

Jæja, það var gott að menn tóku eftir því í tíma að laun seðlabankastjóra voru allt of lág. Það væri hreinlega til skammar fyrir okkur Íslendinga að það fréttist um heiminn að seðlabankastjórarnir okkar hreinlega liðu skort og jafnvel gætu farið að þjást úr næringarskorti.

Það var auðvitað skandall að laun þeirra voru ekki nema 12 föld lægstu laun og það sér það hver maður að slíkt má ekki fréttast.  Mér líður eiginlega vel með hversu glöggir menn voru að taka eftir þessum smánarlaunum. En nú verður bætt úr og seðlabankastjórarnir munu nú hafa 14 föld lægstu laun og mesta voðanum bægt frá í bili. Ég vona svo sannarlega að þessir glöggu menn sem tóku eftir þessari launasmán beini nú sjónum að kjörum aldraðra og öryrkja og meðhöndli þeirra kjör á sama hátt sem ég geri ráð fyrir að verði.

En hvað sem öðru líður....það er frábært að þessi nýríka þjóð geri vel við embættismenn sína og enn betra að þessir gríðarlega mikilvægu embættismenn fái tæplega tvöföld verkamannalaun í hækkun svona án þess að biðja um það.

Samþykkt að hækka laun seðlabankastjóra um 200.000 kr. á mánuði

Athugasemdir

[Páll Jóhannesson, 6.6.2007 kl. 08:23]

Æi greyin - ekki veitti af, manni skilst að þeir hafi lapið dauðan úr skel og ekki viljum við að þeir eigi ekki fyrir salti í grautinn eða hvað?

[Jón Ingi Cæsarsson, 6.6.2007 kl. 08:54]

Rétt Páll.... sumir hafa verið svo leiðinlegir að kalla þá sjálftökulið og afætur en það er ekki svo. Auðvitað eru þeir þjóðhagslega hagkvæmir og duglegir menn.