Er allt í lagi hjá VG á Akureyri ?

Ég velti því fyrir mér hvort allt sé í lagi hjá VG á Akureyri. Þar fagnar bæjarfulltrúi flokksins hugmyndum um skemmdarverk á svæði sem er á náttúruminjaskrá og hefði stórkostleg áhrif á það sem eimitt er tilgreint í þeirri skrá.

Þessi framkvæmd mundi hafa þau áhrif að Gleráin hyrfi lengstum og gilið, þar sem það er glæsilegast væri vatnslaust...og þar með fossalaust og skessukatlar og annað sem tengist ánni yrðu sviplaus fyrirbrigði.

Fram að þessu hafa bæjaryfirvöld á Akureyri keyrt metnaðarfulla áætlun þar sem reynt verður að endurheimta sem mest af því sem búið er að skemma og eyðileggja þarna síðustu áratugi.

En nú virðist sem skilnings og þekkingarleysi hafi tekið völdin og sérstaklega hef ég áhyggjur af fáránlegri afstöðu bæjarfulltrúa VG sem ég hélt að væri flokkur náttúrverndar.

http://www.umhverfisstofnun.is/Natturuvernd/Natturuminjaskra/nr/299

508. Glerárgil, Akureyri, Glæsibæjarhreppi, Eyjafjarðarsýslu. (1) Árgil Glerár frá Bandagerðisbrú við Sólvelli, upp gilið að ármótum Glerár og Hlífár. (2) Gróðurríkt gil, skógarlundir, fjölbreyttar árrofsmyndanir, fossar, skessukatlar og skútar. Söguminjar.

__________________________

Vatnsaflsvirkjun í Glerárdal - frumathugun
2010030142
Erindi dags. 11. febrúar 2011 frá Fallorku ehf. Óskað er eftir að Akureyrarbær taki afstöðu til breytingar á aðal- og deiliskipulagi Glerárdals og hefji þá vinnu með það fyrir augum að Fallorku ehf verði heimilað að reisa þar um 2,0 MW vatnsaflsvirkjun.

Bæjarráð frestar afgreiðslu.

Andrea Sigrún Hjálmsdóttir V-lista óskar bókað: 

Um leið og Vinstri hreyfingin grænt framboð fagnar áformum um virkjun "bæjarlækjarins" á Akureyri leggjum við mikla áherslu á að unnið verði að deiliskipulagi sem nær til alls Glerárdals sem útivistarsvæðis og náttúruperlu en ekki verði eingöngu miðað við skipulag sem lýtur að tiltekinni virkjun.