Græðgin á sér engin takmörk./ Ráðist að náttúruminjum ?

 

Fallorka ehf. hefur óskað eftir því að fá heimild til að reisa 2 MW vatnsaflsvirkjun í Glerárdal við Akureyri. Bæjarráð Akureyrar fjallaði um málið í dag en frestaði því að afgreiða það.

Þessi tillaga ef fram næði að ganga gerði það að verkum að Glerárgil efra yrði vatnslaust að mestu stóran part ársins og Akureyrarbær yrði sér ævarandi til skammar að eyðileggja einn fallegasta og merkilegasta stað bæjarlandsins.

Nú eru sorphaugarnir loksins að hverfa af Glerárdal og þá láta menn sér detta slíka firru í hug. Fallorka reyndi þetta í tíð fyrri meirihluta og var vísað frá ...en nú reyna þeir aftur og ætla að láta reyna á hæfni og skynsemi L-listans. Satt að segja er ég uggandi um að bæjarfulltrúar á Akureyri séu ekki nægilega meðvitaðir um hvað þetta þýddi ef þetta slys ætti sér stað.

Glerárgil efra. ( á náttúruminjaskrá. )

Neðan við Laugarhól og Fálkahaus er gilið með víðum og mjög vel grónum hvömmum að norðanverðu, efst er Vaðshvammur, og var þar hægt að fara yfir gilið með hesta, þá er Snókahvammur (Snjákuhvammur), og í honum lágur en breiður foss (Snókahvammsfoss) með skúta undir.  Hvammur þessi er víða með miklu hvannstóði (geithvönn), sem mun vera tilefni nafnsins (snókur=hvannanjóli), og þar eru einnig  myndarleg birkitré og loðvíðirunnar á klettahjalla neðantil í hvamminum, sem er svo brattur að hann er illgengur.  Þá er breitt nef sem Akrabrekkur nefnist, enda var þar garður og líklega akurgerði áður fyrr.  Þá er Stekkjarhvammur og loks Svarðarhvammur.  Er gilið þá farið mjög að grynnast, og er neðsti hlutinn, þar fyrir neðan, aftur þrengri, en þó eru þar smáhvammar, og Tröllhylshvammur þeirra mestur.  Þar eru þrengsli í ánni, og mikilfenglegir skessukatlar, nánast steinbogi á einum stað, svo stökkva má yfir ána.  Skammt þar fyrir neðan þverbeygir gilið til norðurs, og er þar lítill foss, en því næst klettakví nokkur eða hvammur, með ákaflega ríkulegum og fögrum blómgróðri, m.a. blágresisbreiðum, sem Hesthvammur nefnist. Þar eru einnig allt að 6 m háar birkihríslur og loðvíðirunnar stórir á klettasyllum.  Er þar einn fegursti staðurinn í gilinu.  Fyrir neðan (utan) þennan hvamm endar gilið og er þar breiður sveigur að vestanverðu, sem heitir Réttarhvammur, nú að hluta fylltur upp með mold, en að austan er Steypustöðin (efri).

Glerárgilið efra (sem vel má kalla Glerárgljúfur) er eitthvert mikilfenglegasta og fegursta árgil í Eyjafirði, ekki sízt vegna gróðursins, sem er víða mjög gróskumikill í hvömmunum.  Hann mun þó hafa tekið breytingum á síðustu áratugum, einkum vegna röskunar í Glerárhólunum, norðan og vestan við gilið, og hruns og áfoks þaðan.  Þannig hefur umfeðmingur nú lagt undir sig suma hvammana, og rutt burt öðrum fjölbreyttari gróðri.  Litar hann gilkinnarnar fallega bláar seinni hluta sumarsins.  Í Stekkjarhvammi er stór breiða af rauðkolli (Knautia arvensis), sem er eini þekkti fundarstaður hans á Norðurlandi.  Jarðarber vaxa viða í gilinu að vestanverðu, og þroska myndarleg ber í flestum árum, en önnur ber eru ekki teljandi.

Vilja reisa virkjun í Glerárdal

Athugasemdir

[Jón Ingi Cæsarsson, 18.2.2011 kl. 09:26]

Ég horfi í forundran á að bæjarfulltrúi VG skuli fagna þessu...veit ekki hvort hún er að grínast eða er svona óupplýst ?

[Guðni Hermannsson (IP-tala skráð) 18.2.2011 kl. 20:32]

Sælir. Þegar ég sá þessar foráttu vitlausu hugmyndir leit ég til öryggis á dagatalið, datt sem snöggvast í hug að ég hefði sofið í einn og hálfan mánuð og það væri kominn fyrsti apríl. En sennilega er það ekki ég sem hef sofið yfir mig heldur þeir sem koma fram með svona frámunanlega bjánalegar óskir. Ég hins vegar ætla að gefa Oddi og félögum tækifæri, þau að sjálfsögðu hljóta að kæfa þetta rugl í fæðingu. Og mv. stefnuskrá Vinstri grænna er Andrea greinilega í vitlausum flokki...eða hefur ekki lesið stefnuskrána. Það er ein virkjun í Gleránni eins og er, látum það duga.

[Ingimar Eydal, 19.2.2011 kl. 08:06]

Nokkrar ástæður fyrir því að þetta er fráleitt:

Umhverfissjónarmið.  Virkjunin er áætluð á áður röskuðu svæði, nema menn ætli að setja hana niður í Glerárgljúfrum sem eru friðuð ásamt nánasta umhverfi.  Búið er að bíða í mörg ár eftir því að hætta að urða sorp svo laga megi aðkomuna að dalnum.  Nú er það tækifæri komið og út í hött að ætla þá að eyðileggja dalbotnin með lóni og virkjun.

Hagnaðarsjónarmið.  Þessi virkjun getur varla verið hagkvæm.  Gleráin er ekki það vatnsmikil að hún framleiði það sem þarf til að borga sig upp, ég vil amk. sjá þá útreikninga.  1922 var hún ekki nógu vatnsmikil og varla er hún það í dag. 

Skynsemi:  Það er ekki eins og íslendinga vanti rafmagn eða hvað??

Öryggi:  Að reisa stíflu og lón fyrir ofan Akureyri.  Síðasta stífla Fallorku brast með látum í desember 2006 og sópaði burtu vegum og litlu munaði að banaslys yrði.

Nú reynir á Bæjarstjórn Akureyrar.  Ef þessi vitleysa gengur áfram held ég að mönnum sé ekki sjálfrátt!  Lít á bókun Andreu sem lélegan brandara!  Hún hlýtur að vera upplýstari en þetta.

[Ingimar Eydal, 19.2.2011 kl. 08:07]

Á auðvitað að vera "áður Óröskuðu svæði"

[Hjalti Finnsson (IP-tala skráð) 20.2.2011 kl. 22:18]

Ef það er eitthvað spunnið í núverandi bæjarstjórn á Akureyri þá blása þeir þetta út af borðinu með slíkum krafti að hægt væri að virkja vindinn með 3MW vindmyllu. Ég get haft milligöngu um að skaffa hana frá annað hvort Vestas eða Siemens......