Kerfillinn í sviðsljósinu í sumar sem leið.

Í sumar hefur umhverfissviðið og umhverfisnefndin staðið fyrir aðgerðum til að hefta útbreiðslu kerfils, lúpínu og hvannar í Hrísey. Gerðar hafa verið ýmsar tilraunir og hafa sumar reynst betur en aðrar. Það eru uppi áform um að reyna enn eina aðferðina í Hrísey næsta sumar en það er að setja sauðfjárbeit á sum svæðin þar til prufu.

Það er ekkert sérstaklega einfalt þó svo það hlómi þannig í fyrstu því sauðfé er bannað í Hrísey og hefur verið alllengi. Eyjan var til skamms tíma einangrunarstöð það sem innfluttum dýrum var haldið í sóttkví við innflutning og fleira.  Svo er ekki nú um stundir og því munum við reyna að fá þessu banni aflétt meðan gerð verður tilraun til að hemja skaðvaldana.

Myndin hér að ofan tók ég á gönguferð um óshólmasvæði Eyjafjarðarár sumarið 2006 en þá var kerfillinn í fullum blóma norðan við Kaupang í Staðarsveitinni. Þegar maður horfir á svona mynd gerði maður sér ljósa grein fyrir hversu stór vandinn er og tegundin útbreidd að verða.

Eyjafjarðarsveit réðist til atlögu við kerfilinn á þessu svæði í sumar og það verður áhugavert að fylgjast með því hvernig gengur því þarna hafa þeir verið að beita hrossum á hluta svæðisins.

Athugasemdir

[Stefán Gíslason, 10.11.2008 kl. 08:42]

Ég held líka að Hríseyinga vanti kindur. Kerfillinn á eftir að verða MIKLU STÆRRA vandmál en hann er núna, bæði í Hrísey og annars staðar á Íslandi, verði ekki brugðist skjótt við. Sama gildir að mínu mati reyndar líka um alaskalúpínu og fleiri tegundir. Þess vegna er þessi tilraun í Hrísey svo mikilvæg fyrir okkur öll. Við þurfum að læra að bregðast við vandanum áður en hann vex okkur yfir höfuð. Til er aðferð sem nefnist andvaraleysi. Við erum búin að gera tilraun með hana í fjármálageiranum. Það virkaði ekki vel!

[Guðríður Gyða Eyjólfsdóttir (IP-tala skráð) 10.11.2008 kl. 21:23]

Er íslenska geitin ekki í útrýmingarhættu?
Starfar ekki ráðunautur hér sem sér um nýtingu geitamjólkur?
Éta geitur ekki skógarkerfil, lúpínur og stóra grasið sem var að yfirtaka lúpínuna úti undir vita í Hrísey?
Þannig að ég vil leggja til að flottar íslenskar geitur í útrýmingarhættu verði látnar útrýma þessum óþverralegu nýgræðingum í flóru Hríseyjar.
Mér fannst ákaflega gaman þegar það hlupu geitur yfir veginn á Mýrunum í fyrrasumar þegar ég var þar við rannsóknir.

Við viljum geitur í Hrísey.

[Stefán Gíslason, 11.11.2008 kl. 11:42]

Hmmmm, mér þykir geitahugmynd Guðríðar býsna athyglisverð. Þarna er hægt að slá þrjár flugur í einu höggi: Styðja við geitastofninn, reyna að hefta útbreiðslu ágengra tegunda (= vernda líffræðilega fjölbreytni) og varðveita og auka sérstöðu Hríseyjar!

[Linda María Ásgeirsdóttir (IP-tala skráð) 11.11.2008 kl. 16:48]

Bravó. Þetta er akkúrat það sem ég er búin að segja í heilt ár. Geitur, geitur og aftur geitur. En fróðir menn segja að það sé ekki hægt að halda þeim í skefjum. Ég skal vera geitabóndi í Hrísey og sjá um þetta. Er að verða atvinnulaus um áramót svo þetta er afar hentugt.

[Jón Ingi Cæsarsson, 12.11.2008 kl. 18:37]

Geitur eru notaðar á Ven þeirri vistvænu eyju við Landskrona ... þar til að halda niðri villigróðri í brekkum og klettum við sjóinn. Geitur væru skemmtileg niðurstaða í þessu máli.