Ekki mæta á olympíuleika.

Það getur auga leið. Sterkustu mótmæli sem hægt er að hafa frammi í þessu máli er að þjóðir heims mæti ekki til Kína á olympíuleika. Kínverjar eru skíthræddir við almenningsáltið því tengdu og þeim er nauðsyn á góðu veðri á vesturlöndum ef efnahagsundrið á að ganga upp.

Enn það er staðreynd, Kína er trénað kommúnistaríki sem fer sínu fram. Auðvitað hrynur þetta einn daginn eins og í Sovét en það gæti verið langt í það. Varla gerist það innanfrá eins og gerðist í Sovétríkjunum sálugu, til þess eru kínverjar allt of beygðir undir vöndinn. Vonin er í því fólgin að þeir neyðist til að breyta til að verða ekki útskúfað af þjóðunum. En ég óttast að svo fari ekki, gróðavonin heldur vesturlöndum að taka á þessum málum, eins og í Ísrael.

Komust ekki til Tíbet

Athugasemdir

[Sporðdrekinn, 16.3.2008 kl. 20:02]

Hvernig væri að mæta og mótmæla á staðnum?

[Ómar Ragnarsson, 16.3.2008 kl. 20:21]

Ég er jafn ósammála því að láta Ólympíuleikana líða fyrir stjórnmál og ég var 1980 þegar Bandaríkjamenn og fleiri fóru ekki til Moskvu. Við ættum að muna út af hverju það var. Jú, Sovétríkin afsökuðu innrás í Afganistan með því að lögleg stjórn landsins hefði beðið þá um hjálp. Og gegn hverjum? Jú, Talibönum, hinum sömu sem Bandaríkjamenn studdu þá en hafa nú herjað gegn í sjö ár.

1984 fóru Sovétmenn ekki til Los Angeles ef ég man rétt. Og skilaði þetta einhverju? Nei, engu nema að stórskaða besta "friðarferli" sem býðst á þessari hátíð sem á að vera hátíð griða, hvar sem hún er haldin.

Ólympíuleikarnir í Berlín 1936 voru notaðir miskunnarlaust til áróðurs fyrir Hitler og viðurstyggilegustu villimennsku okkar tíma. Blindni, barnaskapur og roluháttur vesturveldanna gagnvart Hitler voru skelfileg, en það hefði samt að mínum dómi verið fráleitt að sniðganga Ólympíuleikana 1936.

Stóru mistökin gagnvart því hvar Ólympíuleikarnir eru haldnir eru gerð þegar ákveðið er hvar þeir eigi að vera. Rétti tíminn til að þrýsta á kínverja var að neita þeim um að halda leikana fyrr en þeir hefðu uppfyllt skilyrði um mannréttindi. Það var ekki gert og fráleitt að fara að gera það nú, því það væri í algeru ósamræmi við það að leyfa þeim yfir höfuð að halda leikana.

Tíbet hefur verið jafn hernumið og kúgað í hálfa öld og sú staðreynd hefur legið ljós fyrir, svo og ofríki og mannréttindabrot kínverskra stjórnvalda.

[Víðir Benediktsson, 16.3.2008 kl. 20:23]

Sæll Jón, ég er sammála þér að við eigum að mótmæla svona framferði hvort heldur sem er í Kína eða annarstaðar. Hins vegar er ég ósammála þér með Ólympíleikana. Þetta var gert 1980 og aftur 1984 í kalda stríðinu og var engum til sóma. Að nota saklausa íþróttamenn í pólitískum tilgangi er ekki sæmandi að mínu mati auk þess sem ég held að það geri bara illt verra. Það heldur aftur af kínverjum vitandi  að vestrænt fréttafólk flykkist til þeirra á næstunni.

Lifðu heill. 

[Imba sæta (IP-tala skráð) 16.3.2008 kl. 20:25]

100% sammála þér Jón Ingi, gróðavonin fælir hinn vestræna heim frá því að styggja Kínverja. Annars held ég að almenningur sé alveg til í að sýna stuðning. Hvernig væri að mótmæla fyrir framan kínverska sendiráðið? Ég er til....

[Víðir Benediktsson, 16.3.2008 kl. 20:26]

Sé að við Ómar höfum verið að skrifa nánast á sömu mínútunni og erum greinilega sammála, hefði getað sparað minn pistil ef ég hefði beðið í tvær mínútur.

[Páll Jóhannesson, 16.3.2008 kl. 21:05]

Víðir! þú biður bara Jón Inga að eyða þinni færslu  og málið er dautt .

Spurningin er hins vegar hvernig eigum við að mótmæla framferði Kínverja?. Heimurinn þorir ekkert að gera, af hverju? Jú því um leið og fólk hneykslast á framferði Kínverja notfærir það sér án þess að hafa samviskubit eitt augnablik ódýrt vinnuafl þeirra af því að þeir fá svo munaðarvörurnar sínar svo ódýrar vörur sem all flestir Kínverjar hafa ekki efni á að kaupa og eiga. Ekki einvörðungu ódýrt vinnuafl heldur barnaþrælkun líka, það er staðfest, því miður. Í fyrsta lagi átti aldrei að gefa Kínverjum kost á að halda þessa ólympíuleika, fyrr en þeir væru búnir að taka til í sínum ranni.

[Gísli Baldvinsson (IP-tala skráð) 16.3.2008 kl. 22:36]

Ég ætla mér að vera ósammála þér í dag kæri Jón. ÓR er með ansi góðan vinkil.

[Jón Ingi Cæsarsson, 16.3.2008 kl. 22:36]

Ég er ekki að tala um að fella niður leikana... færum þá á stað þar sem þeir hafa verið haldnir áður og keyrum þá þar. Kínverjar hafa ekkert með þá að gera enda reikna ég með að íþróttamenn hafi takmarkaðan áhuga á að mæta til svona landa.

[Jón Halldór Guðmundsson, 17.3.2008 kl. 13:07]

Tek undir sjónar mið Ómars Ragnarssonar. Íþróttir eiga að mynda samband milli þjóða og gera það oft á tíðum.