Það grynnist.

10.12.2007 | 20:54

Það er athyglisvert að fylgjast með þessu. Það er greinilegt að það er að grynnast á þessu. Einn og einn skjálfti er nú sjáanlegur í harða berginu í efri lögum. Þetta eru að vísu óyfirfarnar niðurstöður sjálfvirkra mælinga en samt sem áður er munstrið greinilegt.

Það er rétt sem Ómar bendir á í athugsemdum við annað blogg hér við að upptök eru að færast til austurs og ekki langt í Hálslón frá þeim austast liggja. Það er skrambi freistandi að tengja þessi umbrot því ógnarfargi sem búið er að búa til á þessu viðkvæma landi. Jarðskorpan er ekki þykk á Íslandi og auðveldlega má sjá hvernig land hefur lyfst á árþúsundunum frá því ísöld lauk. Á sama hátt má gera ráð fyrir að sig hefjist og brotalamir myndist þegar milljónum tonna af vatni er safnað á land sem ekki er langt síðan reis undan fargi jökla.

En af hverju hefjast þessar hræringar þá þarna, 15 - 20 km vestan við sjálft lónið ? Það er viðfangsefni fyrir jarðvísindamenn að skoða. Kverkfjallareinin er brotalöm þar sem gera má ráð fyrir veikleikum. Svæðið þar sem þessi umbrot eiga sér stað er þakið hraunum sem runnið hafa eftir ísöld síðustu og þau ná inn að jökli og sprungukerfið hverfur undir jökulinn við Kverkfjöll. Austar er minna um hraun enda er þetta austasti hluti eldvirka kerfisins á Íslandi. Kannski er jarðkskorpan einfaldlega að síga undan farginu þarna fyrir austan svæðið og þá gefa sig fyrirstöðurnar í djúpinu en þarna hefur ekki gosið í þúsundir ára...þarna nákvæmlega. Það er ekki langt í eitt yngsta hraunið þarna, hraunið í Hvannalindum. Ég tek undir þessar skoðanir sem líklegar, að við gætum séð fyrsta manngerða eldgos á Íslandi.