Merkileg tíðindi.

Í sumar sem leið sendi ég fyrirspurn til Veðurstofu, nánar tilgreint í júlí, svohljóðandi.

       Varðandi hrinu smáskjálfta við Upptyppinga. Það hefur verið
>     viðvarandi virkni frá Bárðarbungu að Herðubreið í nokkur misseri.
>     Svæði við Upptyppinga er skilgreint sem hluti af
>     Kverkfjallareininni. Teljast þessi skjálftar þá vera annar atburður
>     en sú virkni eða hluti af henni eða er þetta ef til vill undanlát
>     vegna upphleðslu milljóna tonna af vatni skammt austan við svæðið .
>     Það væri athyglisverð kenning og því spyr ég. Er það jarðfræðilega
>     ómögulegt að þetta geti verið afleiðing þessa að verið er að safna í
>     Hálsalón ... þetta helst svolítið í hendur tímasetningin frá í vetur ?.
>     Þetta var svona fyrir forvitni sakir og ef þetta er á röngum stað
>     viljið þið þá koma því áfram
>     Takk fyrir
>     Jón Ingi

Mér barst svo svar því það er sama hversu vitlausar spurningar við amatörar sendum á Veðurstofuna, okkur er alltaf svarað og það er til mikillar fyrirmyndar.

> Sæll Jón,
>
> þú spyrð um mögulegt samhengi á milli Hálslóns og skjálftavirkni við
> Upptyppinga.
> Ég tel ekki líklegt að fylling Hálslóns hafi áhrif á skjálftavirknina við
> Upptyppinga. Virkninnar þar varð fyrst vart í lok febrúar þegar áfyllingin
> var frekar hæg og hún er í u.þ.b. 20 km fjarlægð frá lóninu. Hins vegar
> sjáum við virknina við Upptyppinga mjög vel vegna þess að nú er þétt net
> jarðskjálftamæla í kringum Hálslón til að fylgjast með virkninni þar. Ef
> þess nyti ekki við hefðum við kannski mælt um 100-150 skjálfta af þeim
> 2100 sem við nú höfum mælt á svæðinu. Enn hefur enginn skjálfti mælst við
> eða undir lóninu, hvorki fyrir áfyllingu né eftir að hún hófst.
> Skjálftarnir við Upptyppinga eru athyglisverðir fyrir það hversu djúpt í
> jörðu þeir mælast. Sennilega er einhver kvikuhreyfing í gangi þarna niðri
> á 15-20 km dýpi, en líklegast er að sú kvika haldi sig áfram niðri á því
> dýpi. Til eru mörg dæmi um skjálftavirkni samfara landrisi, sem að öllum
> líkindum er vegna kvikuhreyfinga án þess að það fari að gjósa
> (Eyjafjallajökull 1999, Hellisheiði 1994-1998 o.fl.). (Maður skal þó
> aldrei segja aldrei......) Enn hefur ekki mælst landris við Upptyppinga,
> en eftir viku fara menn frá Jarðvísindastofnun H.Í. á svæðið til að GPS
> mæla í kringum Hálslón og Upptyppinga.
>
> Með bestu kveðju,
>
> Steinunn S. Jakobsdóttir

Þetta er skemmtilegt pælingaefni og það nýjasta er að Páll Einarsson tjáir sig með nokkuð afgerandi hætti í dag. Hann telur að bæði gætum við séð eldgos tengjast þessum atburðum og nefnir febrúar á næsta ári sem dæmi. Hann segir þessa hreyfingu færast ofar og gæti leitt til eldgoss sem stæði í áratugi og vísar þá til dyngjugoss. Látum Pál botna þetta blogg.

"Páll sagði að ekki væri búið að útiloka að Hálslón hefði haft áhrif á skjálftavirknina við Upptyppinga. Vottur af fylgni væri á milli vatnsborðsins í lóninu og skjálftavirkninnar við Upptyppinga. Hins vegar skorti alveg eðlisfræðilega skýringu á því hvernig á því ætti að standa."

 

Jarðskjálftar við Upptyppinga benda til kvikuhreyfinga

Athugasemdir

[Óskar Þorkelsson, 22.10.2007 kl. 23:08]

já þetta er mjög athyglisvert !

[Jón Halldór Guðmundsson, 22.10.2007 kl. 23:41]

Mér finnst þetta mjög áhugaverð og bendi á að þó að ekki hafi verið sannnað að söfnun í Hálslón yki hættu á eldvirkni var heldur ekki búið að afsanna það.

Við þetta má bæta að mér finnst þessi texti frá Veðurstofunni með þeim hætti að það þarf ekki miklu til að vókja til að hann gæti allt eins verið frá Reðurstofunni.

"Þarna er greinilega töluverð kvikuhreyfing á miklu dýpi og skjálftavirkni við Upptyppinga samfara landrisi."