Ömurleg fréttamennska

Ég er steinhissa á því hvernig fjölmiðlar fjalla um málefni landsliðsins. Eiginlega er það ömurlegt fyrir aðra leikmenn liðisins hvernig meginpartur frétta snýst um það hvort Eiður Smári sé hér eða þar. Mér finnst eiginlega ekkert undarlegt þó halli undan fæti og menn nái ekki dampi.

Fréttir af landsliðinu og hvernig gengur eða muni ganga snúast að megninu til um Eið Smára, leikamann sem er meiddur og hefur vermt varamannabekki síðasta árið og rúmlega það.

Það sást glöggt á tveimur síðustu leikjum að landsliðið og einstakir leikmenn losna úr dróma þegar Eiður er hvergi nærri. Menn berjast og berjast og gamli baráttuandinn birtist á ný.

Hvernig væri að fjölmiðlar snúi sér að faglegri íþróttaumfjöllum og reyni að taka þátt í því að byggja upp sjálfstraust og baráttuanda með að fjalla um það sem skiptir máli. Í guðana bænum hættið þessu dekri við Eið Smára og snúið ykkur að umfjöllun um aðra leikmenn, leikskipulag, andstæðinginn og því sem skiptir máli. Það skiptir landsliðið nákvæmlega engu máli hvort Eiður Smári verður með eða ekki og líklega mesta skynsemin að setja hann út úr liðinu. Það er miklu betra án hans en með.

Frægar dúkkulísur eru ekki til þess fallnar að byggja upp baráttuanda.

Eiður byrjar ekki inná gegn Norður-Írum

Athugasemdir

[Óskar Þorkelsson, 12.9.2007 kl. 08:11]

Margt til í þessu hjá þér.. einnig að ef Eiður er að spila þá snýst allt spil landsliðsins um hann og hann einan.

[Páll Jóhannesson, 12.9.2007 kl. 11:20]

Ég er sammála ykkur, því hafa ber í huga að fótbolti er hópíþrótt en ekki einstaklingsíþrótt. Gott er að hafa í huga að jafnvel veikasti hlekkurinn getur verið sá mikilvægasti.

Áfram Ísland