Glerárgil, Glerárdalur og Vinstri grænir.

Mig rak í rogastans fyrir nokkru. Edward H. Huijbens V-lista skrifaði grein þar sem hann leitar réttlætingar þess að styðja virkjun Glerár ofan Glerárgils. Á dauða mínum átti ég frekar von en sjá stuðing við þessi áform frá varafullrúa VG í bæjarstjórn Akureyrar. Þá vissi ég að vísu ekki að hann ætti sæti í stjórn Norðurorku og virtist orðinn nokkuð mengaður af umræðu þar innan dyra. Þá skildi ég betur þessa undarlegu grein frá fulltrúa flokks sem kennir sig við grænt og umhverfisvænt. Ég þekki sjónarmið fulltrúa Sjálfstæðisflokksins og Norðurorkumanna, þau koma ekki á óvart og hefur verið hafnað með formlegum hætti tvisvar sinnum í bæjarkerfinu.

Nú er að störfum starfshópur sem hefur það verkefni að skilgreina Glerárdal og nágrenni sem fólkvang.  Friðað Glerárgilið með alla sína skessukatla og fossa leikur þar mikið hlutverk og ég fullyrði að fá bæjarfélög á Íslandi eigi önnur eins tækifæri eins og koma þeim dýrðarstað í virka tengingu við bæjarbúa og gesti.

Göngustígar beggja vegna gilsins gætu orðið einn eftirsóttasti staður í bæjarlandinu fyrir þá sem vilja njóta umhverfis og náttúrfegurðar.

Þau skammsýnu sjónarmið að virkja Glerá fyrir smáræði af rafmagni, taka ána í rör og tæma gilið stærstan hluta árins eru hreinlega óskiljanleg.

Sérstaklega af því ég held að þeir sem láta sér detta þetta í hug séu fullkomlega meðvitaðir um þá vinnu sem nú er í gangi með fólkvanginn Glerárdal.

Ég skora því á þá sem láta sér detta það í hug að virkja Glerá og spilla einum stórbrotnasta stað í bæjarlandinu að kynna sér þá vinnu og möguleika sem felast í að koma á virku aðgengi að náttúrvættinu Glerárgili efra.

Við skuldum Glerá og Glerárdal virðingu og þurfum að endurgreiða þau skemmdarverk sem unnin hafa verið á þessu svæði á undanförnum áratugum. Ég trúi því að ef menn rýna lengra og  láti þeir af þessum skammtímasjónarmiðum, sem ráða för þegar talað er um virkjun Glerár ofan Glerárgils ,þá átta þeir sig á að verið er að fórna meiri hagsmunum fyrir minni þegar talað er um að reisa smávirkjun í bæjaránni okkar.

Jón Ingi Cæsarsson

Fulltrúi í umhverfisnefnd og á sæti í starfshópi um að gera Glerárdal að fólkvangi.

Birtist 8.2.2013 í Akureyri vikublað.

Athugasemdir

[Guðjón Sigþór Jensson, 8.2.2013 kl. 17:23]

Mig rak líka í rogastans á dögunum þegar eg sá svonefndan Tunguveg auglýstan frá Leirvogstungu yfir Köldukvísl og Varmá um friðlönd í Mosfellsbæ.

Eg vona að sem flestir leggist þversum í þessu máli!