Krossnesborgir - ný aðkoma komin í gagnið.

 

Staðið hefur til í nokkuð langan tíma að færa formlega aðkomu að Krossanesborgum frá gamla staðnum að Hundatjörn með bílastæði og aðkomu frá Óðinsnesi. Það er gert m.a. vegna að gatnamót á gömlu aðkomunni og þjóðvegar 1 eru stórhættuleg, vegna aksturhraða og lélegs útsýnis.

Nú er búið að tengja stíg frá aðkomunni við Óðinsnes inn á gamla stígakerfið norðar og leiðin vestan Hundatjarnar nú orðin afar góð og skemmtileg. Það ætti því að vera tímabært að loka þeirri gömlu og taka úr notkun.

 

Nýja aðkoman við Óðinsnes er orðin vel fær og þar er skiltið góða sem áður var á gamla staðnum vestan við borgirnar.

Nú á aðeins eftir að laga stæðið, malbika og gera enn vistlegri og skemmtilegri aðkomu að þessari náttúruperlu okkar Akureyringa.

 

  Fuglalíf var rannsakað sérstaklega sumarið 2003 og 2008. Í ljós kom að alls urpu 27 tegundir fugla á svæðinu, þ.e. um 35% af öllum íslenskum fuglategundum. Þéttleiki fugla er á svæðinu mikill, sumarið 2003 var hann um 600 pör/km² og hafði aukist um 100% frá því 5 árum fyrr. Nokkrar fuglategundanna sem verpa á svæðinu eru á válista. Fyrir fleiri fuglategundir er svæðið mikilvægt varpland.

Við Djáknatjörn er eitt fjögurra fuglaskoðunarhúsa á Akureyri og Hrísey.

 

 

Á svæðinu var um tíma kotbýlið Lónsgerði, en enn sést móta fyrir húsatóftum. Þá má á svæðinu enn sjá merki um vatnsveituskurð, sem gerður var um aldamótin 1900. Fyrsti akvegur í norður frá Akureyri, lagður 1907, liggur um svæðið og er nánast eini búturinn sem eftir er af þeim vegi. Á tímum síðari heimsstyrjaldar voru hermannabraggar á svæðinu, byssuhreiður og gaddavírsflækjugirðingar, sem enn er sjást leifar af.

 

Frá því ég fór að fara í Krossanesborgir á sjöunda áratug síðustu aldar hefur margt breyst. Gróður er í örri framför og birki og víðir vaxa hratt og er víða orðið hávaxin tré innan um.

Það er greinilegt á stígum að umferð fólks um borgirnar er að aukast og stígar sem voru lítt sjáanlegir eru nú orðnir vel sýnilegir. Það á við td um stíg að fuglaskoðunarhúsinu við Djáknatjörn.

( Sumt af þessu texta er fengið af síðu umhverfisstofnunar )  http://www.ust.is/Frodleikur/Fridlystsvaedi/nr/2751

http://www.visitakureyri.is/media/visitakureyri2008//krossanesborgir_2.pdf