Glerá

Glerá

Glerá var Öskubuskan okkar og því þarf að breyta. Nú þegar hefur verið unnið nokkuð í svæðum sem næst liggja ánni og nú er svæði á norðurbakkanum frá Glerárgötubrú og upp að stíflu orðin einn vinsælasta svæði göngu og hjólreiðamanna í bænum. Áfram upp með ánni meðfram Hlíðarbraut er einnig stórgóður stígur og fjölfarinn.

 

En betur má ef duga skal og möguleikarnir eru miklir. Skipulagsnefnd hefur nú endurvakið verkefnið Glerá – frá stíflu til sjávar, en þar er lokið við að skipuleggja svæðið frá stíflunni niður til sjávar. Ástand svæðis neðan Glerárgötunnar  er mjög slæmt og því verður að kippa í lag sem fyrst. Von er að tillögur í þessu efnum skili sér á næstu vikum ef vel gengur.

 

Nú þarf að líta lengra og líta til Glerár ofar en gert hefur verið fram að þessu. Fyrst þarf að ljúka stíg með ánni neðst á Háskólasvæðinu og í framhaldi af því, beina sjónum til fjalls og sjá fyrir sér stíg með ánni allt til náttúrvættisins Glerárgils, sem er eitt best varðveitta leyndarmál í náttúru Akureyrar. Með gerð göngustígs með ánni frá Þingvallastræti – Hlíðarbraut og upp í átt til Glerárdals myndi opnast stórkostlegur útivistarkostur fyrir Akureyringa og gesti okkar. Það er ekki mikið mál að leggja útivistarstíg upp með ánni og að mínu mati aðeins spurning hvenær en ekki hvort þessi stígur kemur.. helst báðum megin ár til að fá hring sem kalla mætti Glerárgilshringinn.

 

Þar með opnaðist aðgengi með beinum hætti að hinu geysifallega Glerárgili, tuga metra djúpu, með skessukötlum og fossum. Í brekkunum norðanmegin eru skjólsælir, gróðurríkir bollar þar sem stórkostlegt er að liggja og hlusta á árniðinn og fuglana á fallegum sumardögum.

 

Í dag er gömul brú ofan gilsins sem þarf að endurnýja. Uppgræðsla er hafin á gömlu sorphaugasvæðnum austan ár og skammt í að núverandi sorphaugum verður lokað og hægt að ganga frá því svæði þannig að sómi sé að.

 Fyrir þessum hugmyndum hef ég barist og mun halda því áfram.