Stígagerðin á fullu. Nú við Hörgárbraut að undirgöngum.

 

Hafin er gerð göngustígs frá Bónus við Langholt og út á Skútahæð.

Lögð var á það áhersla við vinnslu og aðdraganda gangagerðar undir Hörgárbraut að gengið yrði frá göngutengingum á svæðinu. Eins og kunnugt er hefur göngustígurinn endað við Bónus í fjölda ára.

Í þessari lotu mun þessi stígur ná að undirgöngunum og strætisvagnastöðin færð sunnar, nær Bónus.

 

Síðan þarf að halda áfram með þennan stíg að Hlíðarbraut, sennilega verður farið austan Sjónarhóls og þá er leiðin orðin greið alveg norður að útivistarsvæðinu í Krossanesborgum. Að vísu á eftir að setja bundið slitlag á stíg meðfram Óðinsnesinu, nyrst á svæðinu, en það mun gerast þegar gatan verður malbikuð. Stígurinn er kominn og nýja bílastæðið við Krossanesborgir verður vonandi gert klárt á næsta ári en það hefur ekki sigið að fullu.

Í sumar hefur verið unnið mikið gerð göngu og hjólastíga en í haust var búið að ganga frá yfir 7 km af stígum og enn bætist við eins og sjá má hér. Þess má geta að stígagerð á Akureyri, á ári, hefur verið um 2 km að meðaltali, og af þessu má sjá að vel hefur verið gefið inn hjá bæjaryfirvöldum við þetta mikilvæga verkefni.

                                           

Athugasemdir

[Anna Dóra Gunnarsdóttir, 25.10.2009 kl. 11:09]

Ég bjó í þónokkur ár við Strandgötuna og börnin mín ólust þar upp. Bónus var til húsa á Óseyri og þangað fór ég margar ferðirnar trillandi barnavagni á undan mér. Fyrstu tugi metranna gat ég farið eftir gangstétt meðfram Hjálteyrargötunni, en þegar að Hagkaupum kom, var ekkert lengur til að létta mér aksturinn og ég þurfti að ýta börnunum á undan mér yfir klungur og grjót, í rigningum einnig drullufen. Bónus flutti um set, en klungrið ekki fyr en löngu seinna. Nú er þarna fínasta gangstétt og auðvelt að komast leiðar sinnar, en ég er fyrir löngu flutt. Eftir gleði mína yfir að fá þarna þessa góðu gönguleið, flutti ég þangað sem sárlega vantar göngustíga. Sá göngustígur sem Akureyringar eru að útbúa og liggur frá Bónus upp á Skútahæðina og sjáfsagt seinna að AK-inn, tengist þar með stígnum frá AK-inn að BYKO. Þar endar sælan og ég þarf að lauma mér meðfram þjóðveginum frá heimili mínu á Lónsbakka niður að hringtorginu við BYKO. Nú bíð ég bara spennt eftir tenginu frá þeim stað út að Lónsbakka og hlakka mikið til. Vonandi verð ég ekki orðin karlæg þegar að þeim kafla kemur, en hann verður á ábyrgð Hörgárbyggðar.