Starinn kominn til að vera.

 

 

  Í nokkur ár hef ég séð nokkra stara á ferð hérna á Eyrinni. Ég veit til að þeir hafa verpt og komið upp ungum hérna nærri. Í fyrrasumar varð ég ekkert var við stara en núna hefur heldur betur orðið sprenging í fjölda.

Að undanförnu hefur hópur fugla haldið sig hér í nágrenni við mig og áðan taldi ég 20-30 fugla við Hjalteyrargötuna og á ÚA túninu. Skemmilegt hvað hann heldur sig í hópum ólíkt skógarþrestinum.

Maður eiginlega furðaði sig á hversu seint þessi fugl dreifði sér um landið en hann hefur verið í nokkuð stórum stíl á höfðuðborgarsvæðinu.

En nú hefur það gerst sem maður bjóst við ... starinn er kominn til Akureyrar í stærri stíl en áður hefur sést.

Fuglinn á myndinni er ungfugl með grátt nef en þegar hann fullorðnast meira verður það skærgult og áberandi. Allir fuglarnir sem voru að kroppa í kringum mig áðan voru fullorðnir þannig að ég geri ráð fyrir að þarna fari foreldrar í fæðuleit fyrir unga í hreiðrum á ókunnum stað, enn sem komið er. Ég ætla að reyna að ná eigin mynd af Akureyrarstara en þessi sem hér fylgir með er ættuð af netinu.