Sennilega tala þeir af sér fylgið fram til kosninga.

VG er sérkennilegt stjórnmálaafl. Margt sem þeir hafa fram að færa er jákvætt og enginn efast um hugsjónir þeirra tengdar félagshyggju og umhyggju fyrir náttúrunni.

En sem stjórnmálaflokkur verður ósveigjanleiki og þröngsýni einstakra þingmanna og lítt ígrunduð nálgun þeim að falli. VG mælist oft vel í aðdraganda kosninga en þegar líður að því að kosningabaráttan hefst þá fara kjósendur að hlusta og þá hverfur af þeim fylgið á mettíma.

Mér sýnist að svo gæti farið nú.... enn á ný. VG hefur verið að dala hægt og bítandi og ef Álfheiður Ingadóttir, Jón Bjarnason, Kolbrún Halldórsdóttir og fleiri byrja að tala eins og venjulega er hætt við að VG verði komið niður í sín hefðbundnu 15% og Sjálfstæðisflokkur og Framsóknarflokkur komnir í lykilstöðu eins og oft.

Það er erfitt fyrir kjósendur að hlusta á stjórnmálamenn fasta í sama einþykknisfarinu þó ástand í efnahagsmálum heimilanna og fyrirtækjanna sé hrikalegt.... þess vegna er hætt við að við fáum ekki félagshyggjustjórn eftir kosningar því VG verða búnir að tala af sér fylgið. Stjórnmálamenn eru kosnir til að hafa útsjónasemi og sveigjaleika til að stjórna málum. Þá verða þeir að láta af blindri og einstrengingslegri nálgun til mála ef fylgið á ekki að hverfa út í veður og vind.

„Ótrúlegt ábyrgðarleysi“