Askja og nágrenni á þessu ári.

Það verður áhugavert að fylgjast með Öskjusvæðinu á þessu ári. Undanfarnar mánuði og misseri hefur svæðið verið allvirkt og hrinur með upptök á ýmsum stöðum hafa einkennt atburðarrásina. Ég hef áður bloggað um þetta og má því sjá að mér er þetta svæði og ástand þess ofarlega í huga.

Allt frá því ég las Ódáðahraun Ólafs heitins Jónssonar hefur þetta svæði heillað mig umfram flest önnur hér á landi. Ég kem þarna eins oft og ég hef kost og mun aldrei fá leið á því. Fyrir allmörgum árum gekk ég við fjórða mann í fótspor Mývetninga sem þangað gengu til að forvitast um eldsumbrot sem sáust frá byggð. Við fórum frá Svartárkoti og sem leið lá yfir brunann, inn að mynni Dyngjufjalladals og þaðan sem leið lá um Jónsskarð í Öskju. Það var hressandi að fara í bað í Víti eftir þá göngu þó maður lykti svolítið öðruvísi.

Ég fór um Dyngjufalladal sumarið 2007 og læt fylgja með nokkrar myndir úr þeim túr.

Nýjasta jarðskjálftahrinan á eimitt upptök sín vestur við Dyngjufjalladal norðanverðan.. ekki mjög langt frá skálanum sem þar stendur, þó heldur norðar og austar. Ekki er vitað af eldsumbrotum þar seinni aldirnar en þó eru þar hraun og hraunspýjur um allt og ekkert ólíklegra en hvað annað en þar gæti eitthvað gerst þó Askja sjálf sé líklegust í stöðunni. Þar gaus síðast 1961 og þá gaus í þar sem nú heita Vikraborgir og er bílastæði þeirra sem ganga inn að Öskjuvatni.

Þessi mynd er tekin niður við Öskjuvatn í norðvesturhorninu skammt austan Vítis.. ekki hefðbundin mynd frá Öskju.

Svo læt ég fljóta hér með þrjár myndir úr Dyngjufalladal sem er kyngimagnaður en minna þekktur en sjálf Askja.