Fannirnar að hverfa.

 

 

                      

Eitt að þeim sérkennum sem sett hafa svip á nágrenni Akureyrar eru fannirnar í Hlíðarskál og öðrum giljum og skálum í vesturfjöllunum og fjöllunum í Glerárdal. Þessar fannir hafa látið stórlega á sjá síðustu ár og það má segja að þessi þróun hafi hafist fyrir alvöru um 1996. Þá voru óvenju miklir hitar í september og þá sá ég í fyrsta sinn rofna tengingar milli fannana. Áður var þetta ein samhangandi fönn í skálinni og ofan hennar. Haustið 96 sá ég í fyrsta sinn rofna skarð þannig að neðri hluti fannarinnar skiptist í tvær. Enn var þó tenging við fönnina ofanvið.

Eins og sjá má á þessari mynd hér að ofan og tekin er í byrjun september 1990 sést að fönnin er ein órofa heild. Að vísu er dálítið nýsvævi á myndinni en greinilega má sjá fönnina undir henni þegar vel er að gáð.

                      

Þessi mynd er tekin á föstudaginn og þar má sjá þessa gríðarlegu breytingu sem orðin er. Stóra samhangandi fönnin sem setti svip á útsýnið til vesturs í áratugi er orðin svipur hjá sjón. Tvær litlar snjóskellur, löngu rofnar úr samhengi við þá efri.  Það sem eftir er nú seinnihluta ágúst er örþunnt og ef vel haustar gætu þessar neðri fannir horfið í fyrsta sinn í tíð núlifandi manna.

Jöklar og fannir á Tröllaskaga hafa farið illa út úr hlýnun loftlags og jöklarnir tveir sem stærstir voru, Vindheimajökull og Bægisárjökull hafa rýrnað mikið. Vindheimajökull nær því nú varla lengur að falla undir skilgreininguna jökull. Fannir á víð og dreif í bollum og giljum.

                       

Þetta er mynd frá því fyrir 102 árum, Oddeyri 1906. Ekki veit ég hvenær sumars þessi mynd er tekin en þarna er fönnin í Hlíðarskál í öllu sínu veldi og setur mikinn svip á Hlíðarfjallið. Þetta sumar hefur varla farið mikið neðar í bráðnun en þetta. Sennilega er þessi mynd tekin síðsumars því mest allur vetrarsnjórinn er horfinn úr fjöllunum en eftir eru fannirnar sem ég þekkti svo vel úr æsku minni þó svo það hafi nú verið heldur seinna en þessi mynd var tekin 1906.

Mig vantar eiginlega að finna myndir frá hlýskeiðinu frá 1930 - 1965 til að fá samanburð og ætla mér að finna þær, getur varla verið vandamál.