Kveðja eitt af öðru.

     

                  Regina Maris.

 

Nú kveðja fastagestirnir okkar einn af öðrum. Í gær kom Elizabeth II sína síðustu ferð til Akureyrar. Í dag er sagt frá að Maxim Gorki sé í sínum síðasta túr hingað núna. Maxim Gorki hefur komið hingað í bráðum 30 ár og ég man eftir honum með sinn rauða stromp og hamar og sigð Sovétríkjanna sálugu. Fyrir all mörgum árum munaði litlu að hann sykki hér norður af landinu eftir árekstur við ísjaka. Minnistæðar myndirnar af honum með nefið á bólakafi...

Þegar ég var barn og unglingur kom aðeins eitt skemmtiferðaskip hingað að sumrum og kom nokkrar ferðir. Það er manni því nokkuð kært í minningunni. Þetta skip var Regina Maris og þætti víst ekki merkilegt á nútíma vísu. Tók tæplega 300 farþega og var um 6000 tonn.

Sennilega á þetta litla skip meira í manni en öll glæsiskipin sem síðan hafa lagt leið sína til Akureyrar.

 

 

Maxim Gorkiy í hinstu Íslandsför

Athugasemdir

[Gunnar Níelsson, 6.8.2008 kl. 16:23]

Mikið er ég nú sammála þér.  Regina Maris var það flottasta sem maður sá.  'Atti lengi heima í gömlu "Verslun Eyja", alltaf var jafn gaman að fara á bryggjuna þegar þetta fallega og að manni fannst stóra skip var í heimsókn.

Lyktin svo framandi en flott, fólkið brosandi og stundum laumaði það einhverju í lófa.  Lúffi í Gránu á þönum og stundum Lúðrasveit Akureyrar að spila. 

Þetta skip er það eftirminnilegasta ekki spurning.