Eyjafjarðará og efnistaka.

   Eitthvað er að gerast við vestur og miðkvísl Eyjafjarðarár í landi Akureyrar. Bakkar sem hafa verið óhreyfðir og grónir áratugum saman eru að brotna niður á löngum köflum frá stað þar sem kvíslarnar skipta sér... í vestur og miðkvísl og alveg niður að brúnni á vesturkvíslinni. Þetta á við báðar þessar kvíslar og bakka báðum megin.

 

Hvað veldur þessu er ekki gott að segja en umhverfisnefnd Akureyrar fékk Halldór Pétursson jarðfræðing til að skoða mál og hann skilaði af sér greinargerð á síðasta fundi nefndarinnar. Í þeirri skýrslu setur Halldór ekki fram afgerandi skoðun á því sem er að gerast en telur fulla ástæðu til að fylgjast vel með málum á þessu svæði.

Bókun fundarins var eftirfarandi.

 Eyjafjarðará - landbrot
2008060054
Halldór Pétursson sérfræðingur á Náttúrufræðistofnun mætti á fundinn og fór yfir niðurstöður skoðunar sinnar á landbroti á bakka vestustu kvíslar Eyjafjarðarár.
Umhverfisnefnd þakkar Halldóri kynninguna. Ekki virðist vera ástæða til aðgerða nú en fylgst verður vel með framgangi rofsins. Nauðsynlegt er að taka upp viðræður við Eyjafjarðarsveit um efnistöku úr Eyjafjarðará og er  forstöðumanni umhverfismála falið að boða sveitarstjóra Eyjafjarðarsveitar á næsta fund nefndarinnar.

Eins og fram kemur í þessari bókun vill nefndin hefja viðræður við sveitarstjórn Eyjafjarðarsveitar og ræða efnistökumál í Eyjafjarðará en eins og mörgum er kunnugt og hefur verið fjallað um er gengdarlaus efnistaka úr ánni farin að valda mögum þungum áhyggjum.

Athugasemdir

[HE (IP-tala skráð) 2.8.2008 kl. 10:12]

Eyjafjarðará er viðkvæmt fyrirbæri og einnig sambúð tveggja sveitarfélaga með mismunandi hagsmuni.  Þetta leiðir hugann að því þegar Leirubrú var byggð.  Bændur í framfirðinum töldu sig merkja aukna flóðatíðni á lönd sín næst ánni eftir það.   Þá má nefna að eftir að Hitaveita Akureyrar (sáluga) lagði hitaveitulögn frá Laugalandi til Akureyrar, jókst hætta á jakastíflum við Ytra-Gil með tilheyrandi flóðum inn að eða inn undir Hrafnagil.  Ekki er mér kunnugt um að bæjaryfirvöld hafi beitt sér í þessum tveim málum.

Ættu umhverfismálefni, sem bæjarstjórn Akureyrar sjálf getur brugðist við, ekki að vera fyrst á dagskrá.  Hvernig er með svifrykið sem bæjaryfirvöld dreifa á göturnar á veturna.   Hvernig er með hávaðamengun sem íbúar bæjarins þurfa að búa við vegna þess að umferðaræðar liggja um íbúðarhverfi og bæjarstjórnin hefur ekki dug í sér til að halda áfram að búa til tengibrautir sem hafa verið fyrirhugaðar áratugum saman.

Á meðan Samfylkingin gerir atlögu að atvinnulífi á Norðausturlandi, með því að veita Helguvíkurálveri forskot til að tryggja sér losunarheimildir, þá standa Samfylkingarmenn í héraði ekki í lappirnar heldur veitast að nágrannasveitarfélögunum sem eru að gefa leyfi fyrir efnistöku (löglega - nota bene) og halda þannig hjólum atvinnulífsins gangandi.  Það hugnast Samfylkingunni auðvitað ekki -  vill helst banna efnistökuna líka svo hægt verði að kyrkja allar framfarir og uppbyggingu á Norðausturlandi.  Sjaldan hefur einn flokkur beðið jafnóþreyjufullur eftir að komast til valda - og sjaldan hefur einn flokkur klúðrað eins miklu, á eins stuttum tíma, og Samfylkingin.  Væri ekki nær að einhenda sér í efnahagsmálin í stað þess að leggja atvinnulíf í landinu í einelti.

[Jón Ingi Cæsarsson, 2.8.2008 kl. 13:10]

HE.... mér finnst þetta innlegg nokkuð utan þess sem þessi pistill fjallar um. Bakkar vestustu kvíslar Eyjafjarðarár eru að brotna og rof hafið. Sandrif í ánni eru horfin og hún er að grafa sig niður á stórum köflum. Þetta þarf að skoða og fylgjast með því mannvirki t.d vegir, stígar, brýr og flugvallarsvæði eru þarna alveg á næstu grösum og gætu verið í hættu í næstu stórflóðum ef náttúrulegar varnir eru að hverfa.

Mér þætti vænt um að menn þyrðu að skrifa undir nafni á þessa síðu... það er allaf skemmtilegra að vita við hvern maður er að tala.