Er Sjálfstæðisflokkurinn að klofna ?

11.2.2008 | 23:47

Er Sjálfstæðisflokkurinn að klofna ?

Frá því ég fór að fylgjast með stjórnmálum á áttunda áratug síðustu aldar hefur Sjálfstæðisflokkurinn staðið sterkur og einhuga lengst af, í það minnsta út á við. Aðeins tvisvar sinnum man ég að hafi komið upp mál sem reyndust flokknum erfið.

Það var þegar Gunnar Thoroddsen og Albert Guðmundsson hlupust undan merkjum, Albert stofnaði Borgaraflokkinn og Gunnar myndaði ríkisstjórn með höfuðandstæðingi flokksins auk Framsóknar.

Og svo var það þegar Davíð Oddsson læddist aftan að Þorsteini Pálssyni og tók hann pólitískt snyrtilega af lífi.

Fyrra málið var flokknum erfitt um hríð en gekk síðan til baka enda voru þetta persónuleg átök manna frekar en málefnaágreiningur. Það var almenn sátt um aðferð Davíðs enda hafði Þorsteinn unnið sér það til óhelgi að missa ríkisstjórn út úr höndum flokksins.

Það sem er að gerast núna er af allt öðrum toga. Það er verið að takast á um stefnur og strauma. Gamla íhaldssjálftökuliðið vill halda sínum kúrs og ráða og ráðskast með íslenskt þjóðlíf líkt og þeir hafa gert í áratugi. Þeir vilja geta fært góðvinum sínum það sem þeim sýnist og þar kristallast Orkuveitumálin, Rei og Geysir greenmálin, sjálftöku og frjálshyggjuliðið enn á ferð. Það er sama liðið og einkavæddi bankana og færði velþóknanlegum, það er liðið sem seldi Símann og grunnkerfið með, og það er liðið sem ætlaði sér að selja orkufyrirtækin, fyrst þessi hjá sveitarfélögum og svo Landsvirkjun sjálfa.

En styrkur þessa hóps hefur minkað og komnar eru fram nýjar áherslur þar sem menn vilja að orka og fleira sé sameign þjóðarinnar, fiskveiðikerfið sé það einnig, og höfuðsyndin sjálf, þessari nýju kynslóð er jafnvel farið að detta í hug að ganga i EES og taka upp Evru.

Það er því sem átakapunktar íslenska stjórnmála hafi færst af svæði sem lá milli Sjálfstæðisflokks og allra hinna, inn í Sjálfstæðisflokkinn sjálfan. Það sé í reynd að verða til jafnarsinnaðir Sjálfstæðismenn sem eiga meiri samleið með jafnaðarmannaflokki á miðju stjórnmálanna en þeim hægri frjálhygguröftum sem lengst af réðu undir stjórn Davíðs Oddssonar.

Þessi tilfærsla á átakalínum inn í Sjálfstæðisflokkinn gætu hæglega leitt til klofnings hans. Þá gæti það orðið með þeim hætti að ysta hægrið, íhaldsliðið og frjálshyggumógúlarnir tækju sig til og færu aðra leið. Kannski er þetta óskhyggja og allt eins gæti sá hópur hrakið burtu og frá völdum þau hógværari öfl sem nú ráða ferðinni.

Maður er strax farinn að sjá ákveðinn hóp Sjálfstæðismanna tala formanninn niður á opinberum vettvangi sem er afar sérstakt þegar Sjálfstæðisflokkurinn á hlut að máli.

Það verður spennandi að sjá hvernig fer í þessum sundurleita flokki því loks nú sjáum við ágreining fylkinga í flokknum opinberlega því engum flokki hefur tekist eins vel að halda ágreiningi og sundurþykkju innan veggja eins Sjálfstæðisflokknum. En nú virðist sem þrýstingurinn sé að verða óviðráðanlegur.