Forsetinn situr ekki og velur fólk.

Mér finnst það alltaf jafn galið þegar fólk byrjar að fjasa um orðuveitingar á Íslandi. Menn hafa auðvitað misjafnar skoðanir á því hvort þetta eigi rétt á sér og mér persónulega finnst ekkert að því að fólk fái viðurkenningu fyrir störf sín hver sem þau eru.

Ég er eiginlega mest hissa á fólki sem heldur að forsetinn sitji heima við eldhúsborðið á Bessastöðum og taki tilviljanakenndar ákvarðanir um hverjir og fyrir hvað fólk fær fálkaorðuna. Þetta er ekki svona og ég er svolítið hissa á upplýstu fólki að vita svona lítið um þetta tákn okkar. Bara svona í gamni skelli ég upplýsingum um þessar orðuveitingar hérna með. Mér finnst þetta í góðu lagi og mér finnst oft hálfgerður öfundartónn í mörgum sem hafa allt á hornum sér varðandi þetta mál. Hvernig væri að líta örlítið jákvætt á svona hluti í stað þessa að mála skrattann á vegginn látlaust eins og okkur íslendingum hættir svo til.

Hin íslenska fálkaorða

 

Forseti Íslands sæmir íslenska ríkisborgara fálkaorðunni tvisvar á ári, 1. janúar og 17. júní. Orðuþegar hvert sinn eru að jafnaði ríflega tugur. Þá sæmir forseti árlega nokkra erlenda ríkisborgara fálkaorðu. Sérstakar reglur um orðuveitingar eru í gildi milli Íslands og örfárra ríkja í Evrópu um gagnkvæmar orðuveitingar í tengslum við opinberar heimsóknir þjóðhöfðingja. Samkomulag um þessar orðuveitingar er við öll Norðurlöndin, Þýskaland, Frakkland, Bretland, Ítalíu og fáein ríki önnur. Í tengslum við slíkar heimsóknir verða orðuveitingar til erlendra ríkisborgara talsvert fleiri en að ofan greinir.

Orðustigin eru nú fimm:

Fyrsta stig orðunnar er riddarakrossinn og flestir orðuþegar eru sæmdir honum. Annað stigið er stórriddarakross, síðan stórriddarakross með stjörnu og loks stórkross. Æðsta stig orðunnar er keðja ásamt stórkrossstjörnu en hana bera einungis þjóðhöfðingjar. Gefist tilefni til getur orðunefnd hækkað einstakling um orðustig.

Öllum er frjálst að tilnefna einstaklinga sem þeir telja verðuga orðuþega. Sérstök nefnd, orðunefnd, fjallar um tilnefningar til orðunnar og gerir tillögur til forseta um hverja skuli sæma henni. Nánari upplýsingar um starfsemi orðunefndar veitir orðuritari og hann veitir einnig viðtöku tillögum um orðuveitingar. Orðuritari er nú ávallt starfandi forsetaritari.
Tillögur með tilnefningum verða að berast með formlegum hætti, skriflegar og undirritaðar. Þar skal rekja æviatriði þess sem tilnefndur er og greina frá því starfi eða framlagi til samfélagsins sem talið er að sé þess eðlis að heiðra beri viðkomandi fyrir það með fálkaorðunni. Fleiri en einn geta undirritað tilnefningarbréf en aðalreglan er að undirskrift eins nægir. Orðunefnd berast á hverju ári um 80-100 tilnefningar. Við andlát þess er fálkaorðuna hefur hlotið ber erfingjum hans að skila orðuritara orðunni aftur.

Tilnefningar sendast orðunefnd:

Orðunefnd
Sóleyjargata 1
101 Reykjavík

 

Orðunefnd skipa eftirfarandi:

Ólafur G. Einarsson, fyrrv. ráðherra og fyrrv. forseti Alþingis, formaður orðunefndar
Jón Helgason, fyrrv. ráðherra
Rakel Olsen, framkvæmdastjóri
Ólafur Egilsson, fyrrv. sendiherra
Þórunn Sigurðardóttir, stjórnandi Listahátíðar í Reykjavík
Örnólfur Thorsson, orðuritari

Ellefu sæmdir heiðursmerkjum

Athugasemdir

[Óttarr Makuch, 2.1.2008 kl. 00:20]

Öfund, ég verð seint sakaður um að öfunda aðra, það er hinsvegar hægt að álasa mér fyrir að gleðjast öðrum.

En ég held að flestum sé það full kunnugt að forsetinn sitji ekki og velji fólk úr símaskránni, þó svo það vilji stundum líta út fyrir það.  Hann er hinsvegar "yfirmaður" orðunefndar og ég held að hann beri nafn stórmeistari "orðunefndar"  þe sá sem veitir/afhentir fólki orðurnar svo honum er nú málið svolítið skilt.

Ég hef til gamans tekið saman lista yfir þá sem líklega hafa fengið tilefnislausar orður á árunum 2000-2007, þetta eru 66 einstaklingar.

Listan má sjá hér http://otti.blog.is/blog/otti/entry/404351/

[Björn Jónsson (IP-tala skráð) 4.1.2008 kl. 17:05]

Menn eiga ekki að fá orðu fyrir að stunda vinnuna sína...það er kanski í lagi að veita orðu fyrir hetjudáðir, en hitt er bara bull