Haust í bæ.

 Veður hefur verið heldur hryssingslegt að undanförnu á svæðinu. Haustlitirnir eru smátt og smátt að taka völdin. Ég fór hring með myndavélina í dag og bjóst við að mikið hefði bætt í frá síðustu helgi. En viti menn, það var ekki að sjá að litirnir hefðu mikið breyst þó svo næturfrost og rigningar hafi dunið á í vikunni. Þó fer það ekki á milli mála að styttist í veturinn.

Haustið er samt fegursti tími ársins að mínu mati. Litirnir, oft eru langvinn logn og birtan er sérstök. Í dag var fyrsti í opnu húsi hjá Samfylkingunni á Akureyri. Fólk mætir í Lárusarhús og þar eru pólitíkin rædd af miklu fjöri. Þetta er að verða fastur liður hjá mörgum að koma á þetta opna hús og ég varð mjög var við að menn voru farnir að bíða eftir að opnað yrði á laugardögum.

Á myndinni er haustlauf í Lystigarðinum og birtan í vestrinu gaf þennan skemmtilega blæ. Það er sérstaklega gaman að taka myndir á móti birtunni.