Fagur dagur á Látraströnd.

 Það var fallegur dagur á Látraströndinni í dag. Afrakstur dagsins full myndavél af hráefni. Gott að eiga verkefni þegar ekkert er við að vera. Haustið er komið við norðanverðan Eyjafjörð og litirnir í lynginu eru stórkostlegir. Einkennisjurt Látrastrandarinnar er aðalbláberjalyngið og fátt tekur eins glæsilegum haustlitum og það. http://www.flickr.com/photos/53151484@N00/ > Aðeins meira af myndum dagsins ef menn hafa áhuga á.

Annars er þetta ár stórkostlegt berjaár fyrir þá sem hafa áhuga á að týna ber. Það er ekki mitt uppáhald en það er sannarlega þess virði að skríða um móan með myndavélina að vopni. Mér lætur það betur en berjatínan eða puttarnir.

Það var fátt fólk á ferli á þessum fagra degi en þó brá fyrir einum og einum sem áttu allir erindi í berjamó. Ég fór norður að Svínárnesi og gekk niður að rústum sem eru við sjóinn. Þegar maður er staddur á svona stað finnur maður glöggt fyrir þeirri lífsbaráttu sem átti sér stað áður fyrr og langt fram á síðustu öld. Rúst af steyptum húsum er alveg frammi á sjávarklettunum og ég þarf endilega að leggjast í skoðun á því sem þarna fór fram fyrir á öldum.

Þegar ég fer í svona túra sem er nokkuð oft undrar mig stundum hvað fáir eru á ferli á þeim slóðum sem ég vel mér. Þetta er þó oft hér í næsta nágrenni og þess virði að njóta landsins og náttúrufegurðarinnar. Ég ætti kannski bara að vera feginn.

Athugasemdir

[Óskar Þorkelsson, 2.9.2007 kl. 22:01]

tek undir þetta hjá þér.. ég var að koma innan úr Djúpi og þangað er ekki hægt að fara á þessum árstíma án þess að hafa með sér eina fötu eða svo..  Ég tíndi innst í Ísafirði sem er fyrir þá sem ekki eru innvígðir í Djúpið.. innsti fjörðurinn í djúpinu.  við hjónakornin tíndum með höndum en ekki tínu í um 40 mín.. afraksturinn var 3 kg af bláberjum..

[Páll Jóhannesson, 3.9.2007 kl. 11:51]

Það er nú einu sinni þannig að náttúruperlurnar eru oftar en ekki nær manni en mann grunar. Fólk fer oft um langan veg til að leita eftir náttúrufegurð, mér dettur oft máltækið ,,að fara yfir lækinn til að sækja vatnið" í þessu samhengi. Ísland er land þitt og ávallt þú geymir......

Flottar myndir hjá þér.

[Ása (IP-tala skráð) 5.9.2007 kl. 18:47]

Búinn að "stela" bláberjamyndinni þinni sem desktop background - hún er svo rosalega flott hjá þér að ég stóðst ekki mátið!!
Þú er snillingur í myndatökum og að velja myndaefni!!!