Frábært... en slæmt að þurfa hætta.

Það er ótrúleg búbót fyrir Akureyri og Norðurland allt að hafa beint flug til Akureyrar. Iceland Express á miklar þakkir skildar og að mínu mati er flug þeirra ásamt nokkrum öðrum þáttum það helsta sem tryggir lengingu flugbrautarinnar á Akureyri.

Það að 40 % farþega séu erlendir eru einnig mikil gleðitíðindi. Það skiptir Akureyri og Eyjafjörð geysi miklu máli að verða áfangastaður erlendra ferðamanna. Það hefur skort á að ferðamenn doki við á svæðinu og þessi staðreynd að hingað komi ferðamenn í æ ríkari mæli í beinu flugi ættu að verða vitamínsprauta fyrir ferðamannaiðnaðinn á svæðinu. Nú er bara að spýta í lófana og auka möguleika ferðamanna til áhugaverðra athafna á Akureyri og nágrenni.

Samgönguráðherrann, Kristján L Möller var ekki lengi að taka af skarið og ákveða að flýta uppbyggingu flugvallarins. Því miður hafði forveri hans dregið lappirnar gagnvart þessu svæði. Það er mikill munur á drift þessara tveggja manna og mikil lyftistöng fyrir okkur hér að nú stjórni maður með skýra sýn þessum málaflokki. Vonandi líður að því að Iceland Express og ef til vill fleiri flugfélög verði tenging okkar Akureyringa og Norðlendinga við umheiminn allan ársins hring.

Áætlunarflugi milli Akureyrar og Kaupmannahafnar lokið