Að taka sénsinn !

Ég er einn þeirra sem ákveðinn forsvarmaður svokallaðar fjölskylduhátíðar á Akureyri kallar postula neikvæðninnar. Þessi meinta neikvæðni mín stafar að því að mér er ekki sama hvernig yfirbragð og umhverfi okkar Akureyringa er um verslunarmannahelgi. Frá því 1994 hefur bærinn verið vettvangur ýmskonar atburða sem kallað hefur verið fjölskylduhátíð en hefur haft á sér ýmiskonar aðra ímynd. Það er staðreynd að unglingadrykkja hefur verið mjög áberandi og bærinn hefur þegar fengið á sig slíkt orð út á við. Auðvitað eru flestir til fyrirmyndar og skemmta sér við glens og gaman á daginn og það er bara gaman að því.

En svo líður að kveldi og drykkjan hefst. Því miður er það sem setur hrikalegt yfirbragð á þessa hátíð og kófdrukkin ungmenni hafa lagt undir sig götur og torg í miðbænum og víðar. Það er eimitt það sem postular neikvæðninnar...séra Svavar og ég og margir fleiri hafa áhyggur af og stendur ekki á sama. Þó svo forsvarsmenn hátíðarinnar hafi engar áhyggjur af því og mæli gæði í innkomu í eigin peningabauk.

Nú hefur verið tekin sú stefna að bjóða ekki upp á sérstök unglingatjaldstæði í bænum um verslunarmannahelgina og til stendur að takmarka aðgang að tjaldsvæðum bæjarins við fjölskyldufólk. Þetta er gott og blessað en vandasamt. Maður hefði þá gert ráð fyrir að forsvarsmenn hátíðarinnar tæku mið af því og skoðuðu dagskrá með tilliti til þess að þessi hópur væri ekki markhópur hátíðarinnar í ár. En viti menn. Erindi berst frá postula jákvæðinnar um að halda unglingadansleiki til kl 3.00 tvö kvöld og óskað eftir leyfi til að hafa vínveitingahúsin opin til 5.00. Þetta er ekkert sérstalega fjölskyldulega skilaboð sem okkur bæjarbúum berast.

Bæjarráð hefur samþykkt þetta illu heilli og hvað nú ? Vita unglingar þessa lands að þeir er hvergi ætlaður staður hér í bæ með sín tjöld ? Munu forráðamenn hátíðarinnar auglýsa það sérstaklega um leið og þeir segja borubrattir frá unglingadansleikjunum sem eiga að standa til 3.00 ? Mér er það stórlega til efs.

Að mínu mati er verið að taka hættulega áhættu með að heimila þessa unglingadansleiki og gefa þessum aðilum enn einu sinni veiðileyfi á bæinn og bæjarbúa. En stóra spurningin er....hvar munu þessir unglingar sem hingað koma vegna gylliboða postula jákvæðninnar setja niður sín tjöld ? Ekki á Hömrum eða við Þórunnarstræti. Orðrómur segir að þeir stefni að því að tjalda við Hrafnagil en það sel ég ekki dýrara en ég keypti það.

Hvað sem öðru líður...það er eins gott fyrir löggæsluna að vera við öllu búin. Kannski eigum við bara að vona að rigni eða snjói hér þannig að postular jákvæðninnar fái ekki það sem þeir heimta.