Sorgleg niðurstaða.

Mér fannst vont að sjá hvernig Þórsarar fóru með stjórnarmenn sína á aðalfundi félagins í síðustu viku. Stjórnarmenn voru búnir að leggja á sig ómælt erfiði við að ná þessari niðurstöðu og búið var að skoða og prófa alla möguleika á svæðinu. Bæjaryfirvöld á Akureyri spiluðu með og raunverulega voru það Þórsarar sjálfir sem lögðu upp með þessa tillögu á sínum tíma. Í kosningabaráttunni 2006 komu stjórnarmenn félagsins til okkar Samfylkingarmanna og kynntu hugmyndir sínar að uppbygginu á svæðinu. Þær hugmyndir voru að mestu komnar í þann samning sem búið var að undirrita og almennir félagar felldu síðan fyrir stjórninni á aðalfundi. Það er vond staða fyrir allar stjórnir að lenda í að hafa eftir allt saman ekki umboð til saminga.

En nú er málið allt komið á nýtt stig. Við eigum tvo kosti í stöðunni, segja okkur frá landsmótinu sem mér finnst ekki koma til greina eða snúa okkur annað með málið. Skipulagsyfirvöld á Akureyri eru það framsýn og forsjál að þó svo þetta máli hafi farið í þennan farveg eigum við alla möguleika að halda hér landsmót með glæsibrag og það sem meira er, fáum tækifæri til að byggja upp aðstöðu fyrir íþróttir hér í bæ með glæsibrag. Í mínum huga er aðalatrið að Akureyri eignist sína frjálsíþróttaaðstöðu sem jafnframt gæti verið glæsilegur miðpunktur íþrótta á Akureyri. Ég efast ekki um að þeir sem það vilja taka að sér í samvinnu við bæjaryfirvöld eru til staðar og vert að láta þá ekki bíða neitt eftir þeirri málaleitan. Þó svo Þór hafi ekki borið gæfa til að ljúka þessu á farsælan hátt fyrir félagið verður vonandi meiri sátt innan þeirra raða í framtíðinni.

Í lokin.... smá innskot sem ég tók af heimasíðu UFA sem sýnir okkur og segir að hér verður að rísa frjálsíþróttaaðstaða fyrir þetta afreksfólk framtíðarinnar sem þegar er farið að gera garðinn frægan víða.

Nýjustu fréttir

·         Glæsilegur árangur á MÍ 12-14 ára

Almennt - mánudagur 16.júl.07 11:10 - UFA - Lestrar 11Í gær komu krakkarnir okkar heim af MÍ 12-14 ára, sem að þessu sinni var haldið í Borgarnesi.  Þrettán krakkar fóru með Unnari og tveimur foreldrum og komu þau heim hlaðin titlum og tilheyrandi viðurkenningum.  Andri Már Bragason varð Íslandsmeistari í flokki 13 ára pilta í tveimur greinum; í 100m hlaupi á 13,89sek og í 80m grindahlaupi á 14,78sek.  Við óskum honum innilega til hamingju með árangurinn!

Í flokki 12 ára stráka nældi Bjarki Kjartanson sér í silfur í hástökki og brons í 60m hlaupi og Geir Vésteinsson vann brons í spjótkasti.
Í flokki 13 ára pilta vann Andri áðurnefnd gullverðlaun og Hjalti Björnsson fékk silfur í spjótkasti og brons í 100m hlaupi, auk þess náði boðhlaupssveitin 2. besta tímanum og þar með silfri.
Í flokki 13 ára telpna hampaði Elise Marie Valjaots silfri í hástökki.
Í flokki 14 ára pilta fékk Snorri Björn Atlason silfur í spjótkasti og brons í 100m hlaupi og Ómar Friðriksson náði bronsi í spjótkasti.  Boðhlaupssveitin var með 2. besta timann, líkt og í yngri flokknum, og vann því silfurverðlaun.
Í flokki 14 ára telpna vann Agnes Eva Þórarinsdóttir brons í langstökki og spjótkasti og Heiðrún Dís Stefánsdóttir fékk brons í kúluvarpi og 80m grindahlaupi.  Í boðhlaupi unnu þær einnig bronsverðlaun.Eftir þessa löngu upptalningu á öllum titlunum þarf ekki að koma neinum á óvart að UFA hafi verið ofarlega í stigakeppninni.  Í öllum strákaflokkunum, þ.e. flokki 12 ára stráka, 13 ára og 14 ára, náðu þeir 2. sætinu í stigakeppninni.  Telpurnar í 14 ára flokknum urðu 3. í röðinni.  Í heildarstigakeppninni varð UFA í 3. sæti sem er frábær árangur miðað við að vera með mun færri keppendur en liðin í næstu sætum fyrir ofan og neðan.  Þótt ekki hafi allir unnið hina eftirsóttu titla þá voru allir að standa sig mjög vel og bæta sinn persónulega árangur í mörgum greinum.  Við óskum krökkunum til hamingju með ferðina!

 

Athugasemdir

[Páll Jóhannesson, 18.7.2007 kl. 21:00]

Sæll Jóni Ingi! Ég var gífurlega svekktur þegar samningurinn var felldur, líkt og allir aðrir stjórnarmenn. En ég er þess fullviss að ef bæjaryfirvöld myndu reyna kalla okkur á sinn fund og reyna finna út hvað þarf til að koma þessu í gegn þá yrði það hægt.

Það sem er hvað sorglegast í þessu er sú staðreynd að inn í þetta mál blandaðist pólitík. Ég tel (veit) að þeir sem felldu samningin hafi gert af því að þeir héldu í raun að ef hann yrði felldur þá myndi Akureyrarvöllur fá að standa. Við stjórnarmenn vöruðum við því enda ekkert samhengi þar á milli. En því miður notuðu sumir sér þetta í pólitískum tilgangi og unnu leynt og ljóst að því að eitra fyrir mönnum með því að snúa út úr og samningnum og reyna gera hann hvað tortryggastan fyrir Þór þ.e.a.s. snúa hlutunum á hvolf.

Nú, svo spyr ég mig þeirra spurninga nú - hvar voru þessir menn sem kusu samningin út í aðdragandanum þegar við vorum að glíma við bæinn? af hverju komu þeir ekki okkur til hjálpar ef þetta var svona vont? getur verið að þeir séu að reyna gera sig gilda út á við, með öðrum orðum að sýnast, ég held það. Hvað veldur því að þeir gagnrýna, en benda aldrei á lausnir? Er það ekki ástæða þess að þeir eru jú bara að sýnast?

Að lokum, ég held og trúi því að ef bæjaryfirvöld vildu og reyndu að hafa samband við Þór þá er ekki útilokað að ná samningum. Það var nefnilega ekki allt vont við þennan samning að mínu mati. En fyrst og síðast harma ég stór orð sumra í fjölmiðlum, hefði kosið að menn töluðu saman við sama borð en ekki í gegnum fjölmiðla með stór orð. Fjölmiðlar hafa úr nógu að moða, elta hundkvikindi upp um fjöll og firnindi.

Góðar stundir.

[Jón Ingi Cæsarsson, 18.7.2007 kl. 21:11]

Það er slæmt ef þetta er ástæðan. Bæjarbúar eru búnir að taka þá ákvörðun að nýta svæði Akureyrarvallar í annað enda ekki skynsamlegt að láta lykilsvæði í miðbænum standa ónotað 8 mánuði á ári, þó svo þetta sé auðvitaða tilfinningamál. Aðalskipulag var samþykkt í fyrra þar sem þetta var endanlega staðfest með 99 % samþykki.

 Glæsilegt frjálsíþróttafólk á betra skilið en hola því niður á svæði sem er of lítið og gefur litla möguleika á þróun. Boltinn er hjá Þór... að mínu mati og ef menn telja sig hafa eitthvað meira fram að færa hljóta menn að koma því áleiðis í hvelli.

Það er rétt hjá þér... slæmt þegar menn gera félaginu sínu svona skráveifu... það rýrir trúverðuleika félagsins útávið þegar svona gerist.