Ráðherrar með allt á hælunum.

Jón Steinsson, dósent í hagfræði við Columbia-háskóla, segist ganga það langt að kalla það spillingu, að stjórnvöld skuli gera 700 milljóna ívilnanasamning við fiskeldi Matorku, sem er í kjördæmi Ragnheiðar Elínar Árnadóttur, iðnaðar- og viðskiptaráðherra, og í eigu náins frænda Bjarna Benediktssonar, efnahags- og fjármálaráðherra.

_____________

Það líður varla sá dagur að ráðherrar í ríkisstjórn Ísland séu ekki til umræðu vegna allskonar mála.

Ragnheiður Elín mætir ekki fyrir þingnefnd, ítrekað. Erindi nefndarinnar er að fá upplýsingar um meinta misbeitingu valds, mál sem Jón Steinsson vill kalla spillingu.

Þiggjandi greiðasemi ráðherrans er náfrændi fjármálaráðherra.

Það verður fróðlegt að heyra þegar ráðherranum þóknast að mæta.

Allir vita um fáránleikaferð utanríkisráðherra.

Fjármálaráðherra lýsir því yfir að meirihlutinn ráði, mátti á honum skilja að minnihluti væri óþarfur.

Umhverfisráðherra slær ekki í takt og svör hennar við einföldum fyrirspurnum á þingi í gær voru ámátleg.

Forsætis er sérstakur kapítuli útaf fyrir sig og opnar ekki munninn öðruvísi en bulla einhverja þvælu sem er rekin ofan í hann jafnóðum.

Allir ráðherrararnir voru rukkaðir um skýringar á sviknum kosningaloforðum og fleiru tengt ferð utanríkisráðherra.

Svörin voru út um allt og ekki nokkur leið að fá í þau nokkuð samhengi.

Það er ekki ofsögum sagt að ríkisstjórnin sé með allt á hælunum.