"Frjálslyndi" flokkurinn.

Nú höfum við eignast okkar Le Pen. Frjálslyndi flokkurinn hefur ákveðið að gera út á gruggug mið innflytendamála. Flokkurinn sem barðist að oddi og egg gegn kvótamálum og réttlæti er varðar sameign þjóðarinnar hefur breyst á einni nóttu. Fyrir nokkrum mánuðum þótti flokkurinn vænlegur kostur til samstarfs. Hinn trausti formaður og baklandið hans þótti ábyrgt og fast fyrir. Þó svo þarna væri margir brotthlaupnir íhaldsmenn hafði þeim tekist að koma þeirri ímynd frá. Frjálslyndi flokkurinn var sem sagt nokkuð frjálslyndur flokkur.

En svo kom bylgjan... Jón Magnússon og vinir hans úr Nýju afli birtust á sviðinu og á einn nótt breyttist flokkurinn úr einsmálskvótaflokki í einsmálskynþáttaflokk. Hvað breyttist við það ? Sennilega fátt. Nokkrir þungaviktarmenn stungu af og stukku á umhverfisvagninn hjá Ómari enda vanir að vera í einsmálsflokkum. Eftir sat yfirgefinn formaður flokksins með kjaftforan varaformann og Glænýtt afl.

Megingbreytingin er samt sú að enginn flokkur með sjálfsvirðingu mun nokkru sinni taka upp samstarf við slíkan flokk og því má telja líklegt að atkvæði greitt frjálslyndum sé atkvæði kastað á glæ. Þó svo þeir skröpuðu nægilega til að eiga fyrir þingmönnum munu þeir sitja einangraðir og áhrifalausir á þingi næstu fjögur árin.  Þó hef ég persónulega þá trú að enginn verði afrakstur útibús LE Pen á Íslandi.