Kemur ekki til greina.

20.9.2012 | 09:06

Ásýnd Akureyrar mun breytast verulega ef tekin verður ákvörðun um að leggja 220 Kw fyrirhugaða stóriðjulínu í lofti en ekki í jörð. Mögulegt er að loftlína verði látin þvera Súlumýrar og þvergirða flugvöllinn sunnan flugvallar.

_______________________

Að loftlína af þessari stærðargráðu fari yfir lönd Akureyrar, sem eru í þessu tilfelli framtíðarútivistarsvæði bæjarbúa, kemur ekki til greina.

Nýhafinn er vinna við að skilgreina Glerárdal sem fólkvang og mun fólkvangurinn líka ná yfir Súlumýrar að verulegu leiti. Þverun yfir Glerárdalsmynnið er óhugsandi hugmynd með tilliti til sjónmengunar og þeirra takmarkana sem svona línur setja.

Að leggja línuna í Eyrarlandshálsi þar sem skógurinn í græna treflinum er að ná sér á strik er líka fráleitt.

Akureyringar búa við það vandamál að þrjá raflínur þvera útvistarsvæðin í Naustaborgum og Kjarnaskógi auk þess liggja þær yfir tjaldsvæði bæjarins. Þær línur hefðu átt að hverfa í jörðu fyrir löngu síðan. Krafan stendur upp á eigendur þeirra lína að ganga í málið.

Að þessi lína bætist síðan við og hugmyndin er auk þess að hún þveri Eyjarfjarðarsveit og skeri aðfluglínu að Akureyrarflugvelli er auk þess óhugsandi með tilliti til flugöryggis Akureyrarflugvallar.

Bæjaryfirvöld á Akureyri hafa komið þessum skilaboðum áleiðis hvað varðar bæjarlandið hér og ég trúi varla að raforkufyrirækin reyni að ganga gegn þeim skilaboðum sem felast í því.

Svona línur eiga ekki heima í þéttbýli og enn síður á skilgreindum fólkvöngum og útivistarsvæðum.

Það er tæknilega auðvelt að leysa jarðsetningu 220 kv línu í dag. Í Evrópu eru svona línur að hverfa t.d. í Danmörku eiga þær allar að vera horfnar innan ákveðins tímafrests sem ég man ekki augnablikinu.

Íslensk raforkufyrirtæki verða að setja sig inn í þann hugsunarhátt sem er að verða í þessu bæði hér á landi og annarsstaðar.

Þau eru ekki lengur ríki í ríkinu sem fara sínu fram burtséð frá hagsmunum annarra.