Gámastöðvar og L-listinn.

Nú er er komið hátt á annað ár síðan L-listinn ákvað að gefa sér afslátt af stefnumörkun í úrgangsmálum og koma upp gámastöðvum í hverfum bæjarins. Það var afsláttur frá þeirri stefnumörkun að endurvinnslutunna væri staðsett við hvert hús og flokkun þannig færð nær íbúum með tilheyrandi fræðslu og eftirfylgni. Ég kærði til úrskurðarnefndar skipulagsmála að gámastöðvum  væri plantað án skipulags hér og þar um bæinn, m.a. á skólalóðum. Málinu var vísað frá á þeim forsendum að ég væri ekki aðili máls sem er sérkennilegt en endanlegt hjá þeirri ágætu nefnd.

En hvernig hafa gámastöðvarnar reynst og erum við að sjá ásættanlega lausn á úrgangsmálum með þessari aðferð ?

Að mínu mati er alls ekki svo og ástæðurnar eru eftirfarandi.

·         Árangur í flokkun verður minni því mjög margir fara ekki á gámstöðvar með endurvinnsluúrgang heldur setja hann í óflokkað í heimatunnu.

·         Ekki er hægt að fylgja eftir lélegri og óvandaðri flokkun í gámastöðvum eins og auðvelt er að gera í heimatunnu.

·         Umgengni og umhverfi gámastöðvanna er langt frá því viðundandi og allt of oft má sjá sóðaskap og rusl á svæðunum.

·         Staðsetning gámastöðva verða auðveldlega deiluefni og ljóst er að hugleiðingar um staðsetningu í Innbæ eru umdeildar auk þess sem skólalóðir eru fráleitur staður fyrir slíkt.

·         Það er umhugsunarefni að Akureyrarkaupstaður sé að fjármagna timburmannvirki við gámastöðvar sem síðan eru meira og minna skemmdar og ljótar eftir illa umgengni.

·         Fræðsla til almennings um endurvinnslu nær síður eyrum íbúa þegar flokkun og skil eru ekki við heimahús.

Fleira mætti týna til en ég læt þetta duga í bili. Víða er farið að huga að endurvinnslumálum frekar en verið hefur og síðast var kynnt breyting í úrgangsmálum í Kópavogi. Engu öðru sveitarfélagi hefur dottið til huga að koma sér upp gámastöðvum í líkingu við L-lista úrræðið á Akureyri.  Ég trúi því að Akureyri skipi sér á ný í fremstu röð í úrgangsmálum, hvort sem það verður í tíð núverandi bæjaryfirvalda eða hvort það bíður næsta meirihluta. Metnarleysið sem einkennir þetta ráðslag er ekki í boði til framtíðar hér í bæ.

Jón Ingi Cæsarsson

Umhverfisnefnd Akureyrar.

( birtist í Akureyri vikublað )