Landið rís.. árangurinn að koma í ljós.

Nýtt ár leggst greinilega vel í landsmenn, en samkvæmt væntingavísitölu Gallup sem birt var nú í morgun hafa væntingar íslenskra neytenda nú ekki verið hærri frá því fyrir hrun.

Fjallað er um málið í Morgunkorni greiningar Íslandsbanka. Þar segir að væntingavísitalan hækkaði í janúar um 7,5 stig frá fyrri mánuði sem er aukning um 11% og mælist nú 75 stig, en svo há hefur væntingavísitalan ekki verið frá því í september 2008.  ( visir.is )

Allar undirvísitölur Væntingavísitölunnar hækkuðu frá fyrri mánuði og eru landsmenn því nú jákvæðari en í fyrri mánuði varðandi bæði mat á núverandi ástandi og mat á efnahagslífinu almennt. Mest hækkar undirvísitalan sem mælir mat neytenda á atvinnuástandinu. Sú vísitala hækkar um 14,4 stig frá fyrri mánuði og mælist nú 81,7 stig. Hefur hún ekki verið hærri frá því fyrir hrun. ( mbl.is )

 Bjartsýni landsmanna eykst enda sjá það allir sem vilja sjá það að landið rís og árangurinn af baráttu stjórnvalda og almennings eru orðin mjög sýnileg.

Þó stjórnarandstaðan haldi áfram sínum svartnættissöng hefur það ekki áhrif á landsmenn. Batamerkin eru allsstaðar sjáanleg þó enn sé langt í land að ná stöðunni í sama horf og fyrir hrun. Varla getum við þó átt von á þeim sýndarveruleika sem blasti við á árunum 2005-8.

Þetta hefur tekist án nokkurrar hjálpar frá stjórnarandstöðuflokkunum, reyndar þrátt fyrir eindregna andstöðu og baráttu þeirra gegn stjórnvöldum.

Þeirra verður seint minnst sem þáttakendum í endurreisninni, því miður, enda gerðu þeir sitt besta að að hindra og trufla vinnuna eins og allir hafa séð síðustu tvö til þrjú ár.

Bjartsýni landsmanna eykst

Athugasemdir

[Þórður (IP-tala skráð) 31.1.2012 kl. 12:48]

Jón Ingi, ég fyllist mikilli bjartsýni þegar ég horfi á launaseðilinn, sé hvernig allar nauðsynjavörur hækka stöðugt (matvörur, eldsneyti), horfi á spillinguna og vitleysuna niður á Alþingi, fylgist með hvernig verðtryggðu lánin mín hækka og hækka, samt borga ég af þeim um hver mánaðarmót. Ef bjartsýni mín eykst fyrir alvöru þá er hún ekki mannlegum mætti að þakka, fremur vegna þess að fljótlega koma vorfuglarnir og dagurinn lengist sífellt. En að þakka ríkisstjórninni þessa bjartsýni er mikil afneitun eða fáfræði. 

[Pálmi Einarsson (IP-tala skráð) 31.1.2012 kl. 14:11]

Sammála Jón Inga. Ég sjálfur hef aldrei verið eins svartsýnn, spillingin, mannvonskan og ruglið í þessu landi er algjör og svo mæta stjórmálamenn og þeirra lúðrasveitir með bull eins og þetta og segja að þetta sé allt á réttri leið.

[Anna Dóra Gunnarsdóttir, 1.2.2012 kl. 00:22]

Já, hún er skrítin skrúfa, þessi bjartsýni. Bara að hún gæti smitast til mín.