Eru fráveitumáli í lagi á Akureyri ?

  

Akureyri er að flestu leiti til mikillar fyrirmyndar þegar kemur að fráveitumálum. Gísli Bragi Hjartarson bæjarfulltrúi hafi um það forgöngu að þessum málum var komið í farveg á sínum tíma og undafarna tvo áratugi hefur fráveitukerfið verið byggt upp og lokahnykkurinn framundan þegar byggð verður hreinsistöð í Sandgerðisbót.

  

En hjá því verður ekki komist að takast á við skuggahlið þessa máls því ekki er allt sem sýnist á öllum stöðum. Innan við Akureyri eru nokkrir staðir sem senda skolp og klóak annað en í fráveitukerfi bæjarins. Það eru staðir innan við og umhverfis flugvallarsvæðið, og þar eru m.a. stórir vinnustaðir og það sem verra er nýbyggt Mótorhjólasafn sem ekki er tengt fráveitukerfi bæjarins.  Því miður eru þarna staðir sem senda skolp og klóak beint í opna læki sem ekki á að sjást í nútímalegum bæjum eins og Akureyri er og við viljum að hún sé. Sumir þeirra hafa rotþrær sem er þó skömminni skárra en á ekki að sjást hjá metnaðarfullu þéttbýlissveitarfélagi.

  

Það liggur því fyrir að bæjaryfirvöld verða að takast á við þetta vandamál og það strax. Bæjarbúar vilja ekki að skolp og klóak mæti þeim þegar notið er útivistar á einu vinsælasta útivistarsvæði á Akureyri í Óshólmum Eyjarfjarðarár. Það er ekki mikið mál að taka hús og fyrirtæki á þessu svæði í fráveitukerfi bæjarins. Það sem þarf er að hefjast handa við að leggja fráveitu frá bæjarmörkum í suðri og taka þar inn Kjarnalund, Mótohjólasafnið, flugvöllinn og þau  íbúðahús sem eru hér rétt innan við Innbæjarsvæðið. Svona getum við ekki haft þetta lengur, það særir metnað okkar sem Akureyringa að svona skuli þetta vera enn árið 2011.

  

Akureyri fréttablað

8. sept 2011