Ræs - L-listi. Svefn er ekki í boði hér.

‎6. Hrísey - kerfill og aðrar óæskilegar plöntur í bæjarlandinu
2006080025
Erindi dags. 3. ágúst 2011 frá Jóni Inga Cæsarssyni þar sem hann kynnir samantekt á stöðunni á gróðurlendi Hríseyjar sem hann vann í samvinnu við Þorstein Þorsteinsson.
Umhverfisnefnd er meðvituð um vandamálið með þær framandi plöntur sem herja víða á í bæjarlandinu. Nefndin felur starfsmönnum að leggja fram áætlun um fjármagn og aðgerðaráætlun verksins á næsta fundi.

Þessi bókun er afrakstur greinargerðar og myndasafns sem ég og Þorsteinn Þorsteinsson unnum saman.

Okkur var ljóst að núverandi stjórnvöld á Akureyri höfðu hætt vinnu við stórverkefni í Hrísey sem var baráttan við framandi plöntur sem ógna lífríki Hríseyjar.

Á þessum tveimur sumrum sem L-listinn hefur ráðið för er ljóst að áherslur þeirra í umhverfismálum í Hrísey var allt önnur og aumari en fyrri meirihluti hafði haft frá 2006. Það verkefni var komið á það stig að þurfti að hefjast handa, en í þess stað settist umhverfisnefnd á rassinn og gerði ekki neitt.

Nú sýnist mér að þessi bókun og greinargerð okkar Þorsteins hafi vakið umhverfisnefndina til meðvitundar, en auk þeirra bað ég um að ALLIR bæjarfulltrúar fengju sama erindi. Það hefur vonandi gengið eftir.

Alvarleiki þessa máls er slíkur að það gengur ekki að sofa svefninum langa, þarna þarf að bregðast við og það af miklum krafti.

Vonandi er að birta til og það verður áhugavert að sjá hversu mikill skilningur vakar hjá L-listanum eftir 15 mánaða Þyrnirósarsvefn.