Dalsbraut - forgangsröðun L-listans.

Dalsbraut hefur verið á skipulagi lengi og um hana staðið deilur í langan tíma. Fyrrverandi meirihluti lét gera Miðhúsabraut og ákvað að keyra hana í nokkurn tíma og láta þá umferðarsérfræðinga meta stöðu mála á Brekkunni varðandi umferðarflæði, forgangsröðun og framkvæmdir.

Í vor sem leið komu síðan niðurstöður í þessu máli. Þar var meginniðurstaðan að Dalsbraut væri ekki það fyrsta sem þyrfti að gera á þessu svæði í umferðarmálum. Forgangsmál þarna væri að tengja Miðhúsabraut Þingvallastræti með afgerandi hætti en þar er einn helsti tappinn í umferðarflæðinu. Nætsta mál sem þarf að rýna og framkvæma er að einfalda Þingvallastræti frá Mýravegi að Miðhúsabraut en þar hefur umferðarhraði og öryggismál verið hvað verst á þessu svæði. Nú hefur verið gerð bráðabirgðaþrengingin við umferðaljósin við Dalsgerði, sem hefur bætt ástand öryggismála nokkuð. Annað vandræðahorn er síðan Dalsbraut - Þingvallarstræti þar sem skapast oft hætta.

Niðurstaðan er því samandregin. Fyrsta forgangsmál á þessu svæði er að einfalda Þingvallastræti og tryggja betri tengingu Gerðahverfis við skólareit Lundarskóla.  Annað forgangsmál er að gera þarf hringtorg á mótum Miðhúsabrautar og Þingvallastrætis og tengja Lundarhverfi inn á Miðhúsabraut við Brálund sem er á lokastigi.

Þá er komið að því að huga að Dalsbrautartengingu. Í þeirri framkvæmd. L-listinn er enn við sama heygarðshornið að reyna að slá ryki í augum bæjarbúa með að stokkur sé kostur í stöðunni. Slíkt er ekki bara erfitt framkvæmdar því nokkurn aðdraganda þarf að slíkum stokki sem skortir nokkuð á að sé til staðar. Slík framkvæmd kosta hundruð milljóna umfram vengjulega vegagerð. Ef nægir peningar eru til í bæjarsjóði til að kasta út slíkum fjármunum í gangslitla framkvæmd er fjárhagsvandi Akureyrar orðum aukinn í málflutningi lista fólksins.

Dalsbraut mun koma. Dalsbraut verður ekki tengibraut eins og hugsað var í upphafi. Dalsbraut þarf aðeins að sinna lítilli umferð og tryggja að umferðarflæði á þessu svæði verði sem best. Dalsbraut sem 30 km gata og afgerandi öryggishindrunum mun sinna þessum þörfum fullkomlega. Þetta þarf ekki að gerast á næstu árum verði forgangsröð þeirri sem hér er nefnd að ofan framfylgt. Kannski þarf ekki að huga að Dalsbraut í þessari mynd fyrr en eftir 5-10 ár og þá verður komin enn meiri reynsla á hvernig götu við þurfum á þetta svæði..

Auðvitað væri gott að gera þetta allt í einu en því er ekki að heilsa eins og fjárhagur bæjarins er nú. Því verður að forgangsraða gáfulega og í náinni samvinnu við bestu sérfræðinga. Það er vond pólitík að keyra gegn heilbrigðri skynsemi í nafni kosningaloforða þó annað sannara reynist.

Jón Ingi Cæsarsson

f.v. formaður skipulagsnefndar.