Barkárdalur.

21.7.2010 | 19:23

Barkárdalur og Barká. Tveir bæir voru í Barkárdal og þó ekki væri langt niður í Hörgárdal var einangrun töluverð. Snjóflóð og skriðuföll gerðu oft usla í dalnum og báðir bæir gátu lokast af þegar vöxtur hljóp í Barká og Féeggstaðaá.

Skammur sólargangur er í Barkárdal enda fjöll há og dalurinn þröngur. Ekki voru margir bæir á Íslandi sem nutu sólar jafn skamman tíma á ári og Baugasel en Féeggstaðir voru neðar og þar naut sólar betur.

Barká kemur úr Barkárjökli og er oft mjög jökullituð og mjög sérstakt er að sjá brúnt jökulvatnið mæta silfurtæru lindarvatninu neðan dalsins. Oft endast litaskilin ótrúlega langt niður eftir Myrkánni.

Brúin hér er göngubrú yfir Barkána og gerir kleyft að fara að rústum Féeggstaða sem standa nokkuð hátt í hlíðinni að norðanverðu.

Baugasel fór í eyði 1965 en Ferðafélagið Hörgur hefur endurreist gamla torfbæinn.

Þarna er mjög gaman að koma og sérstaklega skemmtilegt að reyna að setja sig inn í hugarheim og búsetuhætti á þessum sérstaka stað. Þarna bjó síðustu árin nokkuð barnmörg fjölskylda og má nærri geta að oft hefur verið erfitt að halda tengslum við nágranna að vetrarlagi.

Ég hef aldrei gist að Baugaseli en frænka mín Þórdís Aðalbjörnsdóttir lýsti því oft fyrir mér hvernig var að búa þarna sem barn. Hún var þarna á árunum fyrir 1930 og aðstæður eins og þær gerðust lengast af á afdalabæum á Íslandi

Það er eiginlega loforð að gista þarna einhverntíman því ég efast ekki um að þarna er sérstakt andrúmsloft.

Barkárdalur er um 14 km langur. Suðurhlíðar dalsins nefnast Þúfnavallasveigur og fjallið sunnan dalsmynnisins Slembimúli. Úr dalnum liggja leiðir til Hjaltadals, Héðinsskörð og Hólamannaleið.

Barkárjökullinn hefur látið mjög á sjá undanfarin ár og hefur hörfað nokkuð síðustu áratugi.

Flokkur: Bloggar | Breytt s.d. kl. 19:51 | Facebook