Hrossadalur. Þar er margt að skoða.

 

Hrossadalur er nokkurra kílómetra langur, fremur grunnur dalur sem gengur inn í Vaðlaheiðina frá Víkurskarði í norðri og endar við Þórðarstaðaskarð í suðri. Það er ekki hægt að segja að þar sé fjölfarið en þar er afar margt að sjá fyrir þá sem hafa áhuga á Íslenskri náttúru.

Þarna er margt jarðfræðifyrirbæra, flóran er ótrúlega fjölbreytileg auk þess sem kyrrðin er algjör og ilmurinn stórkostlegur

Lækur rennur eftir endilöngum dalnum frá suðri til norðurs og ótrúlegt hvað bætir í hann þrátt fyrir þá staðreynd að þarna eru engir hliðarlækir eða rennsli sjáanlegt á yfirborði.

Í austurhlíð dalsins eru fornar eldstöðvar og líklega eru þær einstakar á þessu svæði án þess að ég hafi á því næga þekkingu. Einhverja milljóna ára gamlar. Minjar um fornt stöðuvatn er um miðbik dalsins og líkegt er að þarna hafi staðið uppi stöðuvatn stíflað af jökli í norðri. Mjög greinilega botnlög eru þarna og breytast eftir því sem ofar dregur .. fínn setsandur neðst en greinlega leirkenndari lög ofar sem hugsanlega má rekja til bráðnunar ísaldarjökulsins. ( ágiskanir mínar en ekki formleg fræði )

Ótrúlega mikið er af blómplöntum í dalnum og það er augljóst að gróður er í mikilli framför vegna minkandi beitar að líkindum. Víða sér maður aðalabláberjalyngið stinga sér upp í gömlum kindagötum og beittum graslendisflekkjum. Birki er að ná sér á strik í austurhlíðunum.

Í dalnum er merkileg rúst af rétt frá því fyrir löngu. Ekki veit ég hvenær notkun hennar var hætt en eftir ástandi timburs virðist það vera meira en hálf öld síðan. Þarna mátti þó sjá leyfar af bárujárni sem segir okkur að réttin var í notkun á fyrri hluta tuttugustu aldar.  Það væri gaman ef einhver veit eitthvað um þetta mannvirki að hann geri athugsemd og fræði okkur.

Hér að neðan eru myndir frá göngutúrnum í dag..

             

           

          

 

Athugasemdir

[Grefillinn Sjálfur - Koma svo! (IP-tala skráð) 20.6.2010 kl. 22:03]

Maður fær nánast óbærilegt kitl i náttúrutaugarnar við að lesa svona og sjá myndirnar.

Aldrei samt heyrt af þessum dal áður og get því miður engum fróðleik bætt við.

[Björg Guðjónsd. (IP-tala skráð) 21.6.2010 kl. 12:43]

Gaman að sjá myndir af gömlu Hrossadalsskilaréttinni.( mig mynnir að réttin hafi verið lögð af um fjárskiptin.) Ég er svo að leyta að á myndunum að merkjasteininum Hafstein. hann á að vera örskammt sunnan við réttina.

Þeir sem vilja lesa um þetta svæði Steinsskarð-Víkurskarð. Hrossadal.Mjóadal, Þórisstaðaskarð Vaðlaheiði. Fnjóskadal.bendi ég á skrif Jóns Kr. Kristjánssonar Víðivöllum Fnjóskadal.Ritaskrá hans var byrt í Árbók Þing. 2003.

Sumt hefur verið byrt í Ferðum FFA. og Súlum.

[Jón Ingi Cæsarsson, 21.6.2010 kl. 13:01]

Eimitt... rétt sunnan við réttina er stór steinn, mjög áberandi í landinu. Kíki á hvort ég slysaðist til að festa hann á mynd.

[Björg Guðjónsdóttir (IP-tala skráð) 21.6.2010 kl. 17:05]

Það fara margar misvísandi sögur af þessum merkjasteini, en hann var kenndur við Júlíus Hafstein sýslumann.V landamerkja milli bæja og hreppa. Einn hellir er þarna sem á að sjást frá jafnslettu var nefndur Skessuhellir er í austurhlíð norðarlega. Beitarhús voru byggð þarna um miðja 19 öld það var bóndi úr Fnjóskadal, en svo var smá grasbýli löngu síðar þó nokkuð eftir aldamótin 1900 en mér hefur ekki tekist að fá nafnið á því.