Umhverfisnefnd á faraldsfæti.

 

Umhverfisnefnd Akureyrar fór í skoðunarferð á ýmsa staði í vikunni.

Skoðuð var jarðgerðarstöð Moltu á Þveráreyrum en þar styttist óðfluga í að vinnsla á lífrænum úrgangi hefjist. Þar hafa menn verið að stilla og prófa tækjabúnað og allt hefur gengið að óskum. Myndin að neðan er tekin við jarðgerðarstöðina á þeim stað sem efnið skilar sér út við lok vinnslu í tromlum.

Þá skoðaði nefndin landmótunarverkefnið á Glerárdal að austan, en þar hefur vegurinn að gönguleiðinni á Súlur og Glerárdal verið færður fjær sorphaugum og niður fyrir hall það sem haugarnir eru nú starfræktir. Landið hefur verið mótað og sáning hafin. Það er ekki langt í að þarna verði landið iðjagrænt og er það gríðarleg breyting frá því ástandi sem þarna var eftir gengdarlausa efnistöku síðustu áratugi. Það styttist líka í að sorphaugarnir fari annað og nú er unnið af festu á lausn þeirra mála. Jarðgerð sú er verið hefur þarna nærri hættir fljótlega eða þegar jarðgerðarstöðin verður komin á fullan snúning.

Að lokum var farið í Naustaborgir og skoðaður árangur þeirrar vinnu að endurheimta Hundatjörn og votlendið sem þurrkað var fyrir mörgum áratugum. Myndin hér að ofan er af hluta nefndarmanna og stjórnendum umhverfismálanna hjá Akureyrarbæ, þeim Helga Pálssyni deildarstjóra og Jóni Birgi Gunnlaugssyni verkefnisstjóra umhverfismála. Þau standa á fyrirstöðustíflu þeirri sem gerð hefur verið til að halda vatni á svæðinu. Árangurinn lofar mjög góðu og mun þetta auka gæði útivistarsvæðisins í Naustaborgum til mikilla muna. Þegar hefur fuglalíf aukist og vonandi fjölgar tegundum við þessa aðgerð, sem er hið mesta þjóðþrifaverk.