Nokkuð til í þessu.

Framkvæmdaráð Sambands sveitarfélaga á Austurlandi telur að með því að loka norður-suður flugbraut Reykjavíkurflugvallar afsali Reykjavík hlutverki sínu sem höfuðborg allra landsmanna. Þetta kemur fram í ályktun frá framkvæmdaráðinu.

___________

Ég hef sett fram þessa skoðun á þessu máli. Ef höfuðborgin er orðin það sjálfhverf ( stjórnmálamennirnir þar ) þá auðvitað er þetta umhugsunarefni.

Skyldur höfðuborgar umfram önnur óbreytt sveitarfélög eru ótvíræðar. Ef stjórnmálamenn höfuðborgarinnar líka á meinta hagsmuni sína sem fyrsta forgang eru hagmunir annarra landsmanna settir í sæti þar aftanvið.

Þar með hefur hlutverk og staða Reykjavíkur sem höfuðborgar sett niður og aðrir landsmenn þurfa að hafa það í huga í framtíðinni .... og jafnvel skipta ef út í það er farið.

Afsalar sér hlutverki höfuðborgar

Siðferðislega rangt af þeim að leiða Sjálfstæðisflokk til valda.

Y-listi Kópavogsbúa í Kópavogi hefur sent frá sér tilkynningu þar sem fram kemur að listinn sjái ekki fram á að geta myndað starfhæfan meirihluta með Sjálfstæðisflokki og Næst besta flokknum í bæjarstjórn. Skorar Y-listinn á framboð í Kópavogi að mynda nokkurs konar þjóðstjórn.

Mikið er skiljalegt að Y listinn geti ekki gert Kópavogi það að leiða Sjálfstæðismenn til valda á ný. Slíkt hefðu verið reginsvik við þá kjósendur sem studdu þá.

Hvað Næstbesti flokkurinn er að gera í því ferðalagi er jafn óskiljanlegt.

Y-listi ekki með í meirihluta

Krossanesborgir - lítill pistill.

Krossanesborgir eru náttúrperla á norðurmörkum Akureyrar. Borgirnar afmarkast að Lóninu í norðri, þjóðvegi 1 í vestri, Óðinsnesi í suðri og liggja að óbyggðum móum í austri skammt ofan fjörunnar norðan Ytra Krossaness.  Borgirnar voru friðlýstar sem fólkvangur árið 2005 eftir margar ára baráttu áhugamanna um að svo væri gert.  Á heimasíðu Umhverfisstofnunar segir eftirfarandi.

 

Krossanesborgir eru svæði alsett klettaborgum eða stuttum klappaásum fyrir norðan Akureyri. Svæðið var friðlýst að hluta árið 2005 sem fólkvangur. Í borgunum er 5-10 milljóna ára basalt, úr því er berggrunnur Akureyrar. Langflestar borganna eru nokkurn veginn eins og ísaldarjökullinn skildi við þær fyrir um 10 þúsund árum. Þær liggja í óreglulegum röðum og þyrpingum, en á milli þeirra eru oftast mýrarsund, og tjarnir í sumum þeirra. Mikill gróður er í tjörnum á svæðinu, sérstaklega Djáknatjörn, en þar vaxa margar nykrutegundir, m.a. hin sjaldgæfa langnykra. Gróðurfar í borgunum er fjölbreytt og hafa þar fundist um 190 plöntutegundir, þar af 16 starategundir. Þetta er um 40% allra íslenskra blómplantna og byrkninga. Fuglalíf er fjölbreytt, þar verpa um 27 tegundir fugla eða um 35% af öllum íslenskum fuglategundum.

Heimild frá heimasíðu Umhverfisstofnunar.
Eitt aðaleinkenni Krossanesborga er mjög auðugt fuglalíf og hafa bæjaryfirvöld á Akureyri, umhverfisnefndin gengist fyrir reglulegri talningu varpfugla í borgunum.  Talið hefur verið þrisvar á fimm ára fresti , síðast var slík talning framkvæmd 2008 og vonandi verður því haldið áfram með reglulegu millibili því þessar skýrslur eru ómetanlegur sjóður fyrir náttúru Akureyrar og Eyjafjarðar. Næstu talningu ætti að framkvæma vorið 2013 til að viðhalda þessu verkefni.
Hér má sjá nýjustu skýrsluna í pdf formi og er hún vistuð á heimasíðu Akureyrar.
http://www.akureyri.is/static/files/vefmyndir/akureyri/framkvdeild/Krossanesborgir_2008_pdf.pdf
Í inngangi  skýrslunnar segir.

Í skýrslu þessari gerum við grein fyrir talningu á fuglum í Krossanesborgum á
Akureyri vorið 2008. Þetta er þriðja talningin í Borgunum að beiðni Akureyrarbæjar. Talið er á 5 ára fresti og fóru fyrri talningar fram 1998 og 2003 (Sverrir Thorstensen og Þorsteinn Þorsteinsson 1999, 2003). Fyrri talningar voru gerðar vegna áforma bæjarins um friðlýsingu svæðisins. Krossanesborgir voru friðlýstar sem fólkvangur þann 27. janúar 2005. “Markmið verndunarinnar var að vernda svæði til útivistar almennings, náttúruskoðunar og fræðslu.
Auk þess er verndaður mikilvægur varpstaður fjölda fuglategunda, búsvæði sjaldgæfra plöntutegunda og sérstæðar jarðmyndanir og þannig stuðlað að varðveislu líffræðilegrar og jarðfræðilegrar fjölbreytni”  Friðunin er þvíí anda Staðardagskrár 21 sem Akureyri hefur tekið virkan þátt í hér á landi.

Krossanesborgir sem útivistarsvæði.

Borgirnar voru lengi fremur óaðgengilegar til útivistar. Síðustu ár hefur verið unnið að því að bæta aðgengi og auðvelda skoðunarferðir um svæðið. Stígar hafa verið lagfærðir, trébrú var sett á mýrarsundið vestast í borgunum og búið er að útbúa nýtt bílastæði við Óðinsnes þar sem skilti upplýsir um það markverðasta sem þar er að finna. Þó skortir mikið á að mínu viti að nóg sé að gert. Það þarf að girða svæðið því nokkuð ber á því að þar sem farið um með hross og það nýjasta er að þar eru óprúttnir aðilar farnir að iðka þann ljóta leik að fara þar um á mótorhjólum. Það þarf ekki að fjölyrða um þann skaða og tjón sem slíkt veldur á viðkvæmum mýrum og fuglalífi. Tvær tjarnir eru í Krossanesborgum. Hundatjörn er syðst, rétt við nýju aðkomuna að svæðinu. Hún er nokkuð röskuð vegna gamalla áveitskurða sem hafa lækkað í henni vatnið um einhverja tugi sentimetra. Það er álitamál hvort eigi að endurheimta upphaflega vatnshæð vegna hinnar nýju aðkomu og hætt við að stígar blotnuðu mjög næst tjörninni.

Hin tjörnin er Djáknatjörn, alveg nyrst og er hún algjörlega óröskuð og náttúruleg. Þar er mjög mikið og líflegt fuglalíf á vorin og fyrri hluta sumars. Af hverju hún heitir Djáknatjörn er ekki vitað en gaman væri að heyra það ef einhver lúrir á sögu um það. Rétt við Djáknatjörn er eitt að fjórum fuglahúsum í landi Akureyrar og þar geta áhugasamir fengið skjól og fylgst með fuglalífinu á staðnum. Í húsinu eru myndir af þeim fuglum sem eiga sér varpstað og viðkomu í Krossanesborgum. Það er mikill gróður í þessum tjörnum, sérstaklega Djáknatjörn, en þar vaxa margar nykrutegundir, m.a. hin sjaldgæfa langnykra.

Nokkuð vestan Djáknatjarnar eru tóftir að Lónsgerði, litlu býli sem var í Krossanesborgum fram á síðustu öld.  Einnig má sjá móta fyrir vatnsveituskurði sem gerður var um 1900. Í gegnum borginar liggur stubbur af fyrsta akvegi sem gerður var norður frá Akureyri og það er mjög skemmtilegt að þarna hafi varðveist sýnirhorn af samgöngumannivirki til kaupastaðar á Íslandi fyrir meira en öld síðan. Ekki má gleyma seinni tíma minjum en setulið Breta hafði nokkur umsvif í borgunum um nokkurt skeið og má sjá húsgrunna, skotgrafir og leifar af varðskýlum hér og þar. Gaddavírsflækjurnar hafa ryðgað niður og eru að hverfa en þær voru nokkuð áberandi víða þegar ég lék mér í borgunum í æsku.

Hægt og bítandi eru Krossanesborgir að ná stöðu sem útivistarsvæði og það má sjá á þeim stígum sem liggja um borgirnar að notkun þeirra hefur vaxið og sérstaklega er áberandi að fólk sækir í það að koma við í fuglaskoðunarhúsinu við Djáknatjörn nyrst í borgunum.  Jafnframt fjölgar þar fólk með hverju árinu sem týnir þarna ber að hausti. Nokkuð þokkalegt berjaland er þarna á stöku svæðum.
Það má orðið sjá gríðarlegan mun á gróðurfarinu og um allar borgir er birkið að ná sér á strik og maður verður stundum hissa að sjá hvar þetta harðgera tré stingur upp kollinum. Nú þegar er trjágróður farinn að setja mikinn svip á umhverfið. Það er eiginlega með ólíkindum þær breytingar sem sjá má þarna síðustu 10 árin. Auðvitað kom þetta allt með algjörri friðun fyrir beit og svo hefur hlýnandi veðurfar sitt að segja eins og annarstaðar á Íslandi, þar sem birkið sækir hratt fram og hækkar sig til fjalla. Það verður orðin milill gróður og skjólsælt víða í Krossanesborgum á næstu áratugum

 

( Birtist áður á Akureyri.net )

Dalavæl..

Evrópustofa, upplýsingamiðstöð Evrópusambandsins á Íslandi, var opnuð  í dag og mun kynna Evrópusambandið fyrir Íslendingum. Ásmundur Einar Daðason, þingmaður Framsóknarflokksins og formaður Heimssýnar, segir að nú hefjist gengdarlaus áróður Evrópusambandsins sjálfs fyrir eigin ágæti.

Óttaleg grenjuskjóða er þessi maður...

Ekki veitir af að mál séu kynnt með öðrum hætti en með þvaðrinu í þessum manni. Hann bullar út í eitt og margt að því sem hann heldur fram er rakalaus þvættingur.

Gott að fólkið í landinu hafi aðgang að öðrðu en þeim bullukokteil sem Ásmundur Einar og félagar hans hafa verið að hella yfir þjóðina síðustu mánuði og ár.

„Gegndarlaus áróður ESB"

Örlög Miðbæjarskipulagsins.

Fyrir tæplega áratug komu fram hugmyndir um að byggja upp miðbæ Akureyrar og koma honum í heildstæðara og form og gæða hann nýju lífi. Allir sem til þekkja vita að miðbærinn okkar hefur verið að dala og frá því vegur hans var hvað mestur á árunum frá 1940 – 1980 hefur mikið vatn runnið til sjávar. Hafnarstrætið, frá Umferðarmiðstöð og norður að Ráðhústorgi var lykilgata í verslun og viðskiptum í bænum. Hliðargöturnar, Kaupvangsstræti, drifið af starfssemi KEA og Skipagata nutu návistar við þessa lykilgötu Akureyrar.

En svo fór að halla undan fæti og fjöldi verslana og fyrirtækja hurfu úr hinum eininlega miðbæ á Akureyri. Kea leið undir lok, Póstur og sími hurfu úr Hafnarstræti og Skipagötu og fjöldi smáverslana fóru annað þar með taldar allar matvöruverslanir sem þar voru og voru ekki fáar. Tími magasína og lágvöruverslananna var runninn upp.

Á árinu 2004 eða fyrir bráðum átta árum síðan var blásið til íbúaþings í Íþróttahöllinni þar sem hátt í 2.000 Akureyringar réðu ráðum sínum og ræddu bæinn sinn. Niðurstaðan úr þessu stóra íbúaþingi var ótvíræð, Akureyringar vildu endurreisa Miðbæinn og gæða hann lífi á ný. Blásið var til stórrar alþjóðlegrar samkeppni þar sem arkitektar víðsvegar úr heiminum sendu inn á annað hundrað tillögur að framtíðaruppbyggingu Miðbæjarins og nágrennis. Ein þessara tillagna var valin sigurvegari og sigurvegarinn var Skotinn Graeme Massey sem síðar vann einnig tillögur að uppbyggingu að Vatnsmýrinni í Reykjavík.

Árið 2006 var síðan lokið heildarendurskoðun Aðlaskipulags Akureyrar og m.a. voru þar settar inn áherslur verðlaunatillögunnar góðu um uppbyggingu á miðbæjarsvæðinu. Meirihlutinn 2006 – 2010 vann síðan að gerð deiliskipulags á svæðinu eins og Aðalskipulagið sagði fyrir um. Endurnýjun eldri eigna, þétting byggðar þar sem bílastæði voru sett í kjallara húsa sem áttu að rísa á núverandi bílastæðum neðan Skipagötu. Jafnframt var Torfunefssvæðið skipulagt með uppbyggingu í huga og keyrt var á endurnýjun hafnarsvæðisins við Miðbæinn þannig að líf skapaðist þar á ný og aðstaðan yrði bænum til sóma.

Þarna var einnig hið umdeilda „Síki“ sem varð tilefni mikilla deilna og skoðanaskipta en var í sjálfu sér aukaatriði í allir þeirri hugmyndavinnu sem unnin hafði verið að frumkvæði íbúanna sjálfra á íbúaþingi.

Deiliskipulagsvinnan var langt komin og sennilega hefur aldrei verið vandað eins til vinnu af þessum toga á Íslandi.  Það sem útaf stóð og var ekki komið í höfn var að ákveða hvort bæjaryfirvöld í samráði við íbúa vildu breyta Aðalskipulaginu og sníða af helstu agnúana t.d. með að fella burtu hið umdeilda „síki“ sem í sjálfu sér var smámál og auðvelt að breyta. En þarna strandaði þessi vinna og nú eru liðin tvö ár, hálft kjörtímabil, og vinnan sem lagt var að stað með að frumkvæði íbúanna sjálfra á íbúaþingi hefur legið niðri síðan þá.

Það eina sem unnið hefur verið við er deiliskipulag syðst á Miðbæjarsvæðinu, Drottingingarbrautarreit sem er samt sem áður aðeins framhald á vinnu sem búið var að framkvæma meðan reiturinn var enn í höndum fyrirtækis sem varð gjaldþrota.

Staða Miðbæjarmála nú:

Núverandi bæjaryfirvöld og skipulagsnefnd hafa sýnt niðurstöðum íbúaþings og fyrirmælum Aðalskipulags fullkomið tómlæti. Málið hangir í lausu lofti og bíður framtíðarinnar að fá í það niðurstöðu. Ef bæjaryfirvöld hafa áhuga á að víkja af þeirri braut sem íbúaþing 2004 markaði þá þarf að ákveða það með formlegum hætti. Miðbærinn á ástandið þar bíður sér ekki til batnaðar, það er öllum ljóst. Það er líka afar mikilvægt að á þessu svæði sé tilbúið heildstætt skipulag og að ekki sé ráðist í „bútasaum“ þar sem einn reitur er tekinn og síðan næsti í algjöru samhengileysi. Það eru vond vinnubrögð. Það eru líka vond vinnubrögð að setja málið á ís og gera ekki neitt eins og núverandi bæjaryfirvöld hafa ákveðið með að fresta endurskoðun Aðalskipulagsins til ársins 2016. Það dæmir mál á þessu svæði til algjörrar kyrrstöðu næstu árin og Miðbærinn heldur áfram að dala eins og öllum er fullljóst að er að gerast, nema ef til vill ráðandi bæjaryfirvöldum. Það þarf að taka á umdeildum málum og afgreiða þau í samræmi við vilja íbúanna.

Ef bæjarbúar vilja ekki „síkið“ þá á að fella það út af Aðalskipulagi og vinna með þá staðreynd í stað þess að gera ekki neitt og þar með er það mál enn þarna, hangandi yfir og óleyst. Að „gera ekki neitt“ er það versta sem boðið er upp á í skipulagsmálum. Það er eins og að reyna fresta framtíðinni.

Þannig á ekki að vinna.

Ef ekkert gerist í Miðbæjarmálum næstu árin mun honum halda áfram að hnigna, mest öll verslun og viðskipti fara annað,  og því miður sjást þess skýr merki að þannig er þróun mála á þessu svæði.

Hvar eru Bændasamtökin núna ?

Matvælastofnun (MAST) segir að ekkert bendi til þess að neytendum stafi hætta af iðnaðarsalti, sem notað hefur verið í matvælaframleiðslu hér á landi.

_______________

Það er búið að æpa mikið á Matvælastofnun og fyrirtækið sem seldi saltið. Merkingar eru samt sem áður greinilegar á umbúðum og allir þeir sem vinna í matvælafraleiðslu ættu að vita að merkingarnar segðu að þetta ætti ekki að nota í matvæli.

Sum fyrirtæki hafa gefið upp í hvað salti var notað og í það minnsta eitt fyrirtæki hefur innkallað vörur.

Fram að þessu hafa Bændasamtökin og landbúnaðurinn átt sér einn óvin, þ.e. jafnaðarmenn sem hafa vilja taka á landbúnaðarkerfinu og færa það til nútímans.

Nú hafa þeir eignast einn í viðbót, Matvælastofnun og þar með hefur óvinum þeirra fjölgað um helming.

En ég sakna þess að Bændasamtökin sem sjaldan þegja ef það hentar þeim hafa þagað þunnu hljóði yfir þætti framleiðslufyrirtækjanna í matvælaiðnaði sem notuðu þetta salt þrátt fyrir að þeim ætti að vera ljóst að það var ekki ætlað í matvæli.

Kannski tengist þögn Bændasamtakanna þeirri staðreynd að bændur eiga meirihluta í hinum ýmsu matvælafyrirtækjum sem framleiða matvæli úr landbúnaðarafurðum.

Mér hefur fundist skorta á að Bændasamtökin hafi ályktað og skorað á þessi fyrirtæki að gefa það upp hvort og þá í hvað þau hafa notað iðnaðarsalt.

Stundum verður þögnin hrópandi.

Iðnaðarsaltið ekki hættulegt

Vetrarfærð í janúar.

Vetrarfærðin ætlar seint að taka enda, en í nótt og morgun hefur snjóað án afláts. Víða er hált undir nýföllnum snjónum og samkvæmt upplýsingum frá upplýsingafulltrúa Landsbjargar hafa björgunarsveitarmenn aðstoðað ökumenn á Kjalarnesi og Kollafirði þar sem bílar fuku út af veginum.

_________________________

Er ekki eitthvað að þegar svona er sagt og skrifað. Janúar er vetrarmánuður en einhvernveginn finnst mér að fólk hafi alveg tapað þeirri staðreynd. 

Illa búnir bílar í vetrarfærð

Eru endurbótalistarnir að leiða Sjálfstæðisflokkinn til valda ?

Viðræður eru hafnar milli bæjarfulltrúa Sjálfstæðisflokksins, Næst besta flokksins og Lista Kópavogsbúa um myndun meirihluta í Kópavogi.

_____________

Það lítur út fyrir að listarnir sem fólkið kaus af því það þoldi ekki gömlu valdhafana í Kópavogi ætli að leiða þá til valda á ný.

Sjálfstæðisflokkurinn í Kópavogi var eitt skýrasta dæmi um spillt vald í sveitarstjórnum áður en hann hrökklaðist frá síðast.

Hvað segja kjósendur þeirra núna þegar

Næstbesti flokkurinn og Kópavogslistinn leiða þá til valda svo þeir geti haldið áfram þar sem frá var horfið fyrir tæpum tveimur árum.

Viðræður um nýjan meirihluta

Hræsni...

„Mér finnst hann hafa vaxið mjög af framgöngu sinni í málinu,“ sagði Bjarni Benediktsson, formaður Sjálfstæðisflokksins, um greinaskrif Ögmundar Jónassonar innanríkisráðherra um Geirsmálið, í umræðuþættinum Hrafnaþingi í kvöld.

Það þarf ekki að hafa um þetta nein sérstök orð.. og sennilega fylgir drottningarviðtal í Mogga í verðlaun.

Bjarni: Ögmundur hefur vaxið mjög

Ekkert liggur fyrir um samning.

Meirihluti Íslendinga er sem fyrr andvígur því að Ísland gangi í Evrópusambandið samkvæmt niðurstöðum nýrrar skoðanakönnunar sem Capacent gerði fyrir Heimssýn, hreyfingu sjálfstæðissinna í Evrópumálum.

_____________

Það liggur ekkert fyrir um hvaða samningur gæti litið dagsins ljós. Á meðan það er þannig eru kannanir marklitlar enda þurfa menn að hafa staðreyndir tiltækar þegar taka á upplýsta ákvörðun fyrir sig.

Þetta sást vel í aðdraganda í Króatíu. Áður en samningsdrög lágu fyrir voru 27% Króata hlyntir aðild.

Þegar kom að því að samningsdrög lágu fyrir og komið að því að taka upplýsta ákvörðun í þjóðaratkvæði brá svo við að 58% voru fylgjandi aðild enda lá fyrir svart á hvítu hvað var verið að fjalla um í málinu.

 Þetta er líklega meginástæða þess að ESB andstæðingar vilja hætta viðræðum, þeir vilja ekki að þjóðin skipti ef til vill um skoðun þegar STAÐREYNDIR liggja fyrir.

Fram að því að samningsdrög verða sýnileg og ljós þá mun afstaða þjóðarinnar byggja á tilfinningum og órökstuddri, óupplýstri skoðun sem byggir á engu nema .... "af því bara" afstöðu.

Ég mun taka afstöðu til aðildar þegar ég veit hvað er í boði og hvort það hentar hagsmunum Íslands að ganga í ESB.

Fram að því ætla ég að segja að ég sé hlyntur aðildarviðræðum, annað ekki.

Vaxandi andstaða við ESB-aðild