Hvernig blað verður Mogginn ?

Það verður fróðlegt að fylgjast með því á næstunni hvort eigendaskiptin á Árvakri breyti Mogganum. Blaðið hefur til fjölda ára haldið því fram að það sé frjálst og óháð fréttablað og hefur reynt að höfða til áskrifenda út frá þeirri sýn.

En allir sem vilja vita það, vita að Mogginn er ekki óháð fréttablað og fréttir þess, eru mjög litaðar af persónulegum skoðunum og sýn ritsjórans og einstakra blaðamanna.

Hverjum datt t.d. í hug að Styrmir Gunnarsson væri trúverðugur ritstjóri óháðs og hlustlauss fréttablaðs. Maðurinn var ein helsta málpípa Sjálfstæðisflokksins og stefnumála hans á Íslandi. Hann barðist með oddi og egg gegn umræðu um ESB, hann varði Davíð Oddsson fram í rauðan dauðan og hallaði sjaldan orði að ráðamönnum flokksins. Hatur hann á Samfylkingunni var pínlegt og nánast snautlegt fyrir mann í hans stöðu.

Nú er Styrmir hættur og nýjir eigendur teknir við. Það verður því t,d, fróðlegt að sjá hvort aðalpenni Sjálfstæðisflokksins, svokallaður blaðamaður, Agnes Bragadóttir, heldur starfi sínu. Greinar hennar eru ekkert annað en pólitískur áróður og pólítísk sýn Sjálfstæðisflokksins og það má vel vera að það sé nýjum eigendum þóknanlegt. En trúverðugleiki hennar sem óháðs blaðamanns er enginn enda eru greinar hennar skrifaðar með bláu bleki og fálkafjöður.

Agnes var í Kastljósi á föstudaginn. Þar notaði hún tækifærið og mærði og skjallaði nýja eigendur. Svei mér þá ef mér fannst ekki að hún væri óörugg með eigið skinn. Það er auðvitað ekkert gefið að nýr Moggi vilji hafa blaðamann Sjálfstæðisflokksins í vinnu, allavegana ekki ef þeir vilja breyta ímynd og stefnu blaðsins.

En þetta kemur í ljós á næstu vikum hvort við erum að fá nýjan og faglegan Mogga eða bara gamla góða flokkstengda Moggann sem styður Sjálfstæðisflokkinn út í eitt yfir gröf og dauða. Þjóðviljinn, Tíminn og Alþýðublaðið dóu fyrir löngu. Eina flokksmálgangið ( þó í dulargerfi að hluta) Mogginn, er ef til vill að breytast í alvöru, óháð og faglegt fréttablað. Ef svo fer gæti ég alveg hugsað mér að gerast áskrifandi því blaðið hefur alla burði til að verða gott fréttablað.