Auðvitað umhverfismat - ábyrg niðurstaða.

Hér er fjallað um Glerárvirkjun II - umhverfismat eða ekki.

 Á síðasta fundi skipulagsnefndar var leitað álits nefnarinnar um hvort ætti að setja Glerárvirkun II í umhverfismat. 

 http://www.akureyri.is/is/stjornkerfid/fundargerdir/skipulagsnefnd/9730

Meirihluti skipulagsnefndar lýsti því yfir að þeir teldu ekki ástæðu til frekar en Efla verkfræðistofa sem vann álit fyrir bæinn.

Niðurstaða meirihluta nefndarinnar hljóðaði svo. 

 Meirihluti skipulagsnefndar tekur undir niðurstöður skýrslu EFLU f.h. Fallorku um að framkvæmdin muni hafa óveruleg umhverfisáhrif.

Því telur meirihluti skipulagsnefndar að ekki sé ástæða til að framkvæmdin skuli háð mati á umhverfisáhrifum.

 

Tveir fulltrúar nefndarinnar vildu virkjunina í umhverfismat og bókuðu svohljóðandi. 

 

 

Jón Ingi Cæsarsson S-lista og Edward H. Huijbens V-lista óska bókað:

 

Að okkar mati er full ástæða til að framkvæma umhverfismat vegna Glerárvirkjunar II.

Ástæður þess eru að okkar mati að:

 

1) Engar fullnægjandi rannsóknir hafa verið gerðar á rennsli Glerár á virkjunarsvæðinu.

 

2) Jarðfræði virkjunarsvæðisins er að mestu ókönnuð.

 

3) Áhrif þess á umhverfi og náttúru að taka bróðurhluta vatnsrennslis úr Glerárgili efra, sem er á náttúruminjaskrá, hafa ekki verið metin.

 

4) Áhrif framkvæmda á útivist og ferðamennsku hafa ekki verið metin á fullnægjandi hátt.

 

5) Að safna vatni í þessu magni ofan byggðar á Akureyri, þar sem Glerá rennur neðar um íbúðahverfi, vekur spurningar sem ekki verður svarað án ofangreindra rannsókna.

 

Það var samhljóða álit okkar félaga að skýrsla Eflu væri góð svo langt sem hún næði, gott upphaf af alvöru skoðun og umhverfismati.

 

Allt of margir óljósir þættir eru tengdir þessari framkvæmd þannig að umhverfsmat samkvæmt reglum þar um væri eina ábyrga afstaðan í þessu og þar af leiðandi væri hún sjálfsögð og skyld.

 

Því miður eru of margir þættir í skýrslu Eflu umræða og ágiskanir um ókannaða þætti og því væri ekki hægt að líta á hana sem gagn sem hægt væri að telja fullnægjandi.

 

Það er því von okkar að Skipulagsstofnun sjái annmarkana og komist að sömu niðurstöðu og minnihluti skipulagsnefndar. 

 

Umhverfismat - já takk.