Skipulagsmál - aðalskipulag.

 Skipulagsmál eru flókinn málaflokkur og oft eru skiptar skoðanir um einstök atriði og heildarstefnumörkun. Aðalskipulag Akureyrar gildir frá 2005 -2018 og tók gildi í upphafi kjörtímabilsins 2006-2010. Eins og gefur að skilja var það nokkuð lengi í vinnslu og verulegur hluti af stefnumörkun þess skipulags var unnið á kjörtímabilinu 2002-2006.

   Þetta skipulag var metnaðarfullt og tekið á ýmsum atriðum sem til nýmæla mátti telja. Þétting byggðar og stefnumörkun í miðbæjarmálum var það sem rótækast mátti telja og auðvitað varð margt af því umdeilt eins og eðlilegt er þegar skipulag á í hlut. Fráfarandi meirihluti vann samkvæmt þessu skipulagi allt kjörtímabilið og fyrir lá metnaðarfull hugmynd að breyttu og nútímalegu deiliskipulagi fyrir miðbæjarsvæðið.

 Á  kjörtímabilinu var síðan unnið að ýmsum nánari hugmyndum sem snéri að ýmsum svæðum og mörgum þeirra er enn ekki lokið. Þar má nefna endurskoðun deiliskipulags Innbæjarins, deiliskipulag fyrir Kjarnaskóg, hugmyndavinna vegna neðsta hluta Oddeyrar og svo mætti lengi telja.   En Aðalskipulag þar að endurskoða. Það eru 6 - 7 ár síðan ég var ásamt félögum mínum í skipulagsnefnd að vinna að endurskoðun aðalskipulagsins sem nú er í gildi.

 Það var því fullkomlega eðlilegt að það skipulag fengi endurskoðun, sérstaklega af því að í því voru ýmis atriði sem voru umdeild og einnig þess eðlis að þörf var á að endurskoða í heild sinni. Eðlilega er ýmislegt sem betur mætti fara í ljósi reynslu og umræðu og full ástæða til að bæta við einhverju nýju, t.d. hvernig bæjaryfirvöld ætluðu að mæta frekari stækkun bæjarins til þeirra svæða sem bíða óskipulögð.     En viti menn ! Nýr meirihluti vísar endurskoðun Aðalskipulagsins aftur fyrir núverandi kjörtímabil og telja ekki ástæðu til að endurskoða Aðalskipulag Akureyrarkaupstaðar 2005 – 2018 fyrr en að loknu því kjörtímabili þar sem þeir hafa tögl og hagldir. Bókun skipulagsnefndar frá því í árslok 2010 kom því flestum í opna skjöldu og lýstu ótrúlegu metnaðarleysi og tómlæti fyrir mikilvægi skipulags og mótunar stefnu til framtíðar.    

 

Þetta er bókun skipulagsnefndar.  Skipulagsnefnd leggur til við bæjarstjórn að neðangreind bókun verði samþykkt. Skipulagsnefnd telur ekki þörf á að endurskoða Aðalskipulag Akureyrar 2005-2018 að svo stöddu en leggur til að gerðar verði þær aðalskipulagsbreytingar sem þörf er á, þ.m.t. á aðalskipulagi Hríseyjar 1988-2008. Aðalskipulag Grímseyjar 1996-2016 er í gildi og ekki þörf á breytingum að sinni.
 

Stefnt verði að því að endurskoða þessar þrjár aðalskipulagsáætlanir fyrir 2018 til að samræma stefnu í einstökum málaflokkum og hefja undirbúning að þeirri vinnu á árinu 2016.   

Með þessari bókun lýsir meirihluti L-lista þeirri eindregnu skoðun sinni að þeir hafi ekki stefnu í skipulagsmálum. Þeir ætla að láta sér duga stefnumörkun fyrri meirihluta og ætla þeim meirihluta sem við tekur af þeim að sjá um framtíðarskipulagsmál Akureyrarkaupstaðar.

 Þeir skila auðu í skipulagsmálum. Það er í sjálfu sér ekki óvænt í ljósi þess hvernig L-listinn hafði unnið árin á undan. Einhvernveginn trúði maður því samt að þeir girtu sig í brók og tækju af skarið og hefðu skoðun á málum. En því var ekki að heilsa og því bíður endurskoðun Aðalskipulag annarra stjórnmálamanna sem hafa víðsýni og þor til  að takast á við málaflokkinn SKIPULAGSMÁL.

Það hefur núverandi meirihluti L-listans ekki. 

( Í Vikudegi fimmtudaginn 1. september 2011.)

Athugasemdir

[Ágúst J. (IP-tala skráð) 1.9.2011 kl. 21:57]

" Hverjum þykir sinn fugl fagur "

[Jón Ingi Cæsarsson, 1.9.2011 kl. 21:58]

En mikið fjári hefur verið gott skipulagið sem fyrri meirihluti samþykkti og vann eftir ... kannski er það bara skynsemi að breyta því ekki.