Ljótur blettur á miðbæ Akureyrar.

 

Hafnarstræti 98, gamla Hótel Akureyri er framhaldssaga sem staðið hefur í áratugi. Þetta hús sem byggt var 1918 var í upphafi nokkuð fallegt og hafði á sér virðuleikablæ. Áratugina á eftir fór því sífellt hrakandi, það var augnstungið, neðasta hæðin gerð að verslunarhúsnæði og nánast allir burðarbitar þeim megin voru skertir og skemmdir til að búa til stærri glugga og fleiri hurðir. Fyrir þremur árum gerðist það svo eftir nokkrar deilur að menntamálaráðherra tók sig til og friðlýsti húsið með mjög þröngum afarkostum Húsafriðunarnefndar og þar með hætti klukkan að tikka, sem þó hafði verið tikkandi í nokkur ár þar á undan. Þar sem reynt var að finna lendingu með gamla húsið. Það gekk ekki eftir margítrekaðar tilraunir og því var ákveðið að auglýsa deiliskipulag þar sem nýtt hús leysti það gamla af hólmi.  Menntamálaráðherra og Húsafriðunarnefnd stöðvuðu það með einhliða ákvörðun Þorgerðar Katrínar þáverandi menntamálaráðherra.

  

KEA keypti þá húsið í því ástandi, á skeflilegri niðurníðslu og reyndar fast í gíslingu Húsafriðunarnefndar, sem ekki tekur í mál að sína sveigjanleika gagnvart uppbyggingunni  og svo aðgerðar og tómlætis núverandi ráðamanna á Akureyri en L-listinn hefur þegar stöðvað hugmyndir að uppbyggingu einu sinni.

  

Nú má ekki við svo búið standa.

  

Ég sem borgari á Akureyri skora á alla sem hlut eiga að máli að taka höndum saman og leysa þetta skelfilega mál. Húsið er forljótur blettur á miðbæ Akureyrar og sómi bæjarins er hreinlega að veði á þessu svæði. Enn sárara er að horfa upp á þetta ástand þegar fréttir af glæsilausnum í miðbæ Reykjavíkur berast okkur þessa dagana.

•   Ég skora að Húsafriðunarnefnd að sýna sveigjanleika og jákvæðni og vinna að lausnum með eigendum í stað þess að halda málinu í gíslingu með ósveigjanleika
• .Ég skora á menntamálaráðuneytið að axla ábyrgð af gjörningum menntamálaráðherra og koma að uppbyggingu með myndarlegum hætti eða þá aflétta friðlýsingunni.
• Ég skora á bæjaryfirvöld á Akureyri að vakna af Þyrnirósarsvefni sínum og kalla saman alla þá er málið varðar og taka frumkvæði sem dugar.
• Ég skora á eigendur að sýna metnað fyrir hönd Akureyrar og Akureyringa og koma af stað alvöru vinnu til lausna á svæðinu.
• Ég skora á þá er sinna öryggismálum á Akureyri t.d. Slökkvilið Akureyrar að þrýsta á að hin tikkandi tímasprengja í miðbænum verði ekki til stórtjóns ef stóra slysið verður.

  Við sem höfum metnað fyrir Akureyri og miðbæinn okkar svíður sárt að sjá Hafnarstræti 98 halda áfram að grotna niður fyrir augum okkar og sannarlega er betra að svona hús hverfi ef þeir sem málinu ráða hafa ekki áhuga, getu eða metnað til að ljúka því farsællega. Látum þetta ekki viðgangast einn áratuginn enn.

Birtist í Vikudegi 7. júlí 2011.