Dánarvottorð umhverfisnefndar ?

Mér er ekki skemmt. Umhverfisnefnd og þau málefni sem þar þarf að taka fyrir er mér hjartans mál og skiptir Akureyri miklu. Nú hefur þessi nefnd starfað í 7 mánuði... fundaði að vísu ekki fyrsta einn og hálfan mánuð eftir kosningar, og satt að segja er maður furðu lostinn.

Það hefur ekki eitt einasta mál verið tekið og afgreitt sem snýr að umhverfismálum sveitarfélagsins. Þó var tekið fyrir og bókað eftirfarandi í sumar.

1.    Staðardagskrá 21- framkvæmdaáætlun 2010-2012
2010070099
Farið var yfir nýsamþykkta Staðardagskrá 21 og áframhaldandi vinnu á þessu kjörtímabili við sameiginlega Staðardagskrá fyrir allt sveitarfélagið.
Sigríður Stefánsdóttir mætti á fundinn og fór yfir þær hugmyndir sem verið hafa til umræðu.
Umhverfisnefnd þakkar Sigríði yfirferðina og mun taka afstöðu til gerðar nýrrar sameiginlegrar Staðardagskrár 21 á næsta fundi nefndarinnar.

Í stuttu máli. Þetta var ekki tekið fyrir á næsta fundi nefndarinnar og ekki þar næsta, reyndar hefur ekki sést síðan. Slíkt er auðvitað forkastanlegt og greinilegt er að formaður nefndarinnar ræður ekki við að leiða þetta starf eða takast á við þann málaflokk sem honum ber. Hann er því engan veginn að standa sig og ég held að hann ætti að segja af sér og kalla til einhvern sem hefur áhuga á að takast á við þessi mál í stað þess að láta málaflokkinn danka í meira en hálft ár. Ég er ekki farinn að sjá að hann vakni til lífsins héðan af.

Dagskrá og afgreiðsla frá síðasta fundi sýnir ef til vill best hvað formaðurinn er ráða við að leiða þetta starf. Tvö erindi frá embættismönnum og báðum frestað...aumara gerist það varla, auk þess sem aðeins fjórir af fimm nefndarmönnum mæta og ekki er kallað í varamann. Ég lýsi ábyrgð á hendur formanni umverfisnefndar og skora á hann að hysja upp um sig brækurnar.

Síðasta fundargerð...dæmi um aumt starf og litla sýn.

Umhverfisnefnd - Fundargerð
54. fundur
16. desember 2010 kl. 16:15 - 17:55
Fundarsalur á 2. hæð í Ráðhúsi

 

Nefndarmenn		Starfsmenn
	Sigmar Arnarsson formaður Hulda Stefánsdóttir  Petrea Ósk Sigurðardóttir  Valdís Anna Jónsdóttir		Helgi Már Pálsson  Jón Birgir Gunnlaugsson fundarritari

1. Endurvinnanlegt hráefni úr grenndargámum - tilboð
2010100106
Farið yfir þau tilboð sem borist hafa nefndinni í endurvinnanlegt hráefni.

Umhverfisnefnd þakkar kynninguna á tilboðunum og felur starfsmönnum áframhaldandi vinnu.

2. Gámasvæði - lengri opnunartími
2010120084
Tekin fyrir samningsdrög um rekstur gámasvæðis með breyttum opnunartíma ásamt gjaldskrá.

Afgreiðslu frestað.