Unnið að bættu umhverfi

22.11.2009 | 14:06

Undanfarna daga hefur svæðið vestan Hjalteyrargötu verið til meðferðar hjá starfsmönnum bæjarins. Búið er að steypa kantstein og mold hefur verið keyrt í svæðið og til stendur að þarna verði snyrtileg gróðurrönd með götunni í stað þess flags og drullu sem þarna hefur verið á áratugi.

Hjalteyrargata átti að verða fjögurra akreina gata í þeim hugmyndum sem uppi voru fyrir löngu en af því mun ekki verða og gatan annar auðveldlega hlutverki sínu með umferð í báðar áttir á tveimur akreinum.

Síðastliðið haust setti umhverfisnefnd sér það markmið meðal annars að ráðast í uppgræðslu og lagfæringu á svæðum sem hafa verið í órækt og vanhirðu. Þetta var meðal annars sett á dagskrá til að draga úr svifryki í bænum og þar hefur óhirðusvæðið við Hjalteyrargötu verið töluverður sökudólgur og mikið fokið úr því öllum nágrönnum til ama og leiðinda auk svo þess skaða sem svifryk hefur á öndunarfæri.

Hafi starfsmenn Akureyrarbæjar þakkir fyrir að nota tækifærið í blíðu nóvembermánaðar að ráðast í þetta þarfa verkefni.