Sorphaugarnir hverfa af Glerárdal.

 

 3.          Sorpmál - framtíðarsýn
2009010228
Deildarstjóri framkvæmdadeildar Helgi Már Pálsson og forstöðumaður umhverfismála Jón Birgir Gunnlaugsson fóru yfir stöðu málaflokksins.
Umhverfisnefnd þakkar starfsmönnum yfirferðina og felur þeim að ræða við Íslenska gámafélagið um flokkun og sorphirðu. Umhverfisnefnd mun taka ákvörðun um framhald sorpmála á næsta fundi nefndarinnar.

Bókun þessi var gerð á fundi umhverfisnefndar í ágúst. Undanfarin ár hefur umhverfisnefnd og starfsmenn framkvæmdadeildar unnið að stefnumótun varðandi sorpmál á Akureyri og Eyjafirði. Eins og flestum er kunnugt hefur ekki náðst að koma þessum málum í ásættanlegt horf á svæðinu. Stórt skref var stigið við opnun jarðgerðarstöðvar á Þveráreyrum fyrr í sumar. Einnig hefur nefndin unnið að mótun verklags og aðferða við sorphirðu á Akureyri með aukna flokkun í huga við heimahús..

Allt þetta tengist síðan lokun sporphauganna á Glerárdal sem er lokahnykkur þessarar áætlunar sem hófst árið 2006 þegar nýr meirihluti tók við á Akureyri. Þá var sett fram neðangreind markmið sem tendust úrgangsmálum. Bæjarstjóri Hermann Jón Tómasson hefur reifað þessi mál í fjölmiðlum að undanförnu og kynnt í grófum dráttum hvað framundan er.

6. Umhverfismál

Umhverfismál í víðum skilningi, náttúruvernd og sorpmál heyra undir nýja nefnd, umhverfisnefnd, sem fjallar um málefni sem náttúruverndarnefnd hafði áður til meðferðar auk sorpmála. Leiðarljós Staðardagskrár 21 um sjálfbært samfélag verða jafnframt leiðarljós umhverfisnefndar. Stefnt er að því að bæjarbúar geti notið náttúrulegs umhverfis m.a. á verndarsvæðum á Glerárdal og í Krossanesborgum og að atvinnulífið verði í sátt við umhverfið.

• Akureyrarbær mun draga sig út úr Sorpsamlagi Eyjafjarðar b/s og stofna hlutafélag ásamt fyrirtækjum til að annast sorpförgun í bænum.
• Áhersla verður lögð á að finna framtíðarlausn á sorpmálum Akureyringa. Leitað verður eftir samstarfi við önnur sveitarfélög um nýjan urðunar­stað þar sem  meðhöndlun sorps verður samkvæmt reglum þar að lútandi og komið verður upp jarðgerðarstöð. Fylgt verður markmiðum um minnkun sorps sem finna má í svæðisáætlun Eyjafjarðar í sorpmálum.
• Grenndargámum verður fjölgað og íbúar hvattir til heimajarðgerðar þar sem því verður við komið.  Hvatt skal til aukinnar flokkunar sorps við heimahús.

 Nú er þetta að ganga eftir allt saman og á næsta fundi umhverfisnefndar verður þessum málum komið í þann farveg sem þarf til að ljúka þessum verkefnum sem eru með þeim mikilvægustu fyrir sveitarfélag eins og Akureyri sem vill hafa sitt á þurru í umhverfismálum.

Myndin er af uppgræðslu á Glerárdal en svæðið neðan núverandi sorphauga hefur verið lagað og grætt upp að verulegum hluta.