Eignarhald stjórnmálaflokka.

13.5.2009 | 16:23

Eignarhald stjórnmálaflokka.

Þarna er Framsóknarflokknum rétt lýst. Hann er að skreppa saman eins og ofþornuð appelsína en samt vill hann halda sínu þó svo hann skrölti í allt of stóru umhverfi.

Sjáum fyrir okkur búttaða konu eða karl sem leggur stórlega af en vill samt halda í gömlu stóru fötin af því þau hafa verið svo lengi í þeim. Þeim fer vafalaust illa að vera í pokandi og allt of stórum fötum.

Hitt er aftur á móti meira áhyggjuefni þegar forráðamenn stjórnmálaflokka tela að flokkurinn "eigi" eitthvað í Alþingishúsinu sem auðvitað er táknræn sameign þjóðarinnar og sameign okkar allra. Framsóknarmenn telja að þeir "eigi" herbergi sem flokkurinn hafi "alltaf" verið í. Fráleit nálgun að halda að stjórnmálaflokkur eigi hluta í Alþingishúsinu.... hugsun og hugarfar þeirra eiginlega skelfir mig svolítið.

Framsóknarflokkurinn telur eðlilegt að þeir haldi herbergi þrátt fyrir að þeir séu bara níu en flokkur sem er verulega stærri og með fleiri þingmenn geti bara kúldrast áfram á sama stað. Þetta er í besta falli frekja ef ekki yfirgangur.

Framsóknarflokkurinn á erfitt með að venjast þeirri hugsun að þeir minnka stöðugt og þingmönnum þeirrra fækki. Það er aftur á móti staðreynd að svo er og þeir verða að sníða sér stakk eftir vexti.

Er kannski hugsun þeirra að þegar flokkurinn verður búinn að missa alla sína þingmenn í fyllingu tímans að herbergið verði enn merkt Framsóknarflokknum og þar verði staðsett safn þar sem sögu flokksins verði gerð skil í heiðgrænu umhverfi. ??

Spyr sá sem ekki veit ???