Að rýna í eigin sök.

Það hefur ekki verið talið sérstaklega marktækt þegar einhver fer að rannsaka eigin mál. Þegar Sjálfstæðisbörn fara að rýna í gjörðir feðra sinna og afa er ekki von að mjög marktækri niðurstöðu.

Þegar þessir sömu rannsakendur þekkja fátt annað en þá stefnu og leiðir sem "flokkurinn þeirra" hefur kennt minkar það enn möguleikana á trúverðugri niðurstöðu.

Mér dytti ekki í hug að gerast rannsóknaraðili í t.d. umferðaróhappi sem ég sjálfur hefði valdið. Alveg sama hversu ákveðin ég væri í að komast að gáfulegri niðurstöðu væri það fyrst og fremst mín sýn og mat sem réði niðurstöðu. " Enginn er dómari í eigin sök" Það má til sannsvegar færa.

Ég átta mig ekki almennilega á því hvað það er sem sjálfstæðismenn vilja græða á að búa til svona niðurstöðu eða álit. Allir vita að Sjálfstæðisflokkurinn hefur stjórnað efnhagsmálum og fjármálum hér óslitið í tvo áratugi. Að halda því svo fram að það sé ekki stefna flokksins sem brást heldur einstaklingar finnst mér hátt til höggs reitt.

Samkvæmt þessu hafa ráðamenn flokksins ekki verið að fylgja stefnu hans og það er áfellisdómur yfir t.d. Davíð Oddssyni, Árna Matthiessen, Þorgerði Katrínu og öðrum þeim fjölmörgu sem samkvæmt þessu hafa ekki verið að vinna samkvæmt stefnu Sjálfstæðisflokksins heldur einhverju allt öðru...

eigið þið annan betri 

„Heiðarlegt uppgjör“

Athugasemdir

[Sigurður Geirsson (IP-tala skráð) 1.3.2009 kl. 17:47]

Hér ertu í raun að blanda saman appelsínum og eplum. Hver var valdur að efnahagshruninu er ekki á verkefnaskrá Sjálfstæðisflokksins, heldur er það á vegum sérstakrar nefndar sem allir stjórnmálaflokkar hafa komið sér saman um þ.m.t. Sjálfstæðisflokkurinn, og síðan sérstaks saksóknara.

Það sem sjálfstæðisflokkurinn er að gera er að fara í naflaskoðun og er skýrslu þessarar nefndar fyrst og fremst ætlað að vera fyrir sjálfstæðismenn, en eins og alltaf þá líta allra flokka menn á allar gerðir Sjálfstæðisflokksins, sem opinberar gerðir, jafnvel naflaskoðun þeirra. Þannig getur flokkurinn ekki einu sinni farið í skoðun á sínum innanhússmálum öðru vísi en að allir vilji koma þar að og allir hafa skoðun þar á, hvort sem þeir eru sjálfstæðismenn eða ekki. Eftir það sem á undan er gengið er ekki nema eðlilegt að farið sé í mjög gagngera naflaskoðun og athugað hvort stefna eða framkvæmd hafi verið með því móti að gera þurfi breytingar á. Það verður þó að segja flokknum til hróss að hann er óhræddur að skoða sín mál og draga af þeim lærdóm, og þar er hann heldur ekki að vernda ákveðna einstaklinga eins og andstæðingum hans er svo gjarnt að gera honum upp.

Enginn annar stjórnmálaflokkur hefur lagt í slíka naflaskoðun. Meira að segja Framsóknarflokkurinn, sem skipt hefur um mikið af sínum mönnum, hefur ekki farið í þessa naflaskoðun, né heldur skoðað að hvaða leiti aðkoma þeirra að stjórnun, eða fjarvera þeirra frá henni, hafi verið áhrifavaldur í þessu hruni. Þeir hafa bara látið duga að henda mönnum á dyr, án þess að skoða nánar hvort það voru þeir, stefna flokksins, eða eitthvað annað sem hefur brugðist. Ekki hefur Samfylkingin heldur farið í neina slíka skoðun, þrátt fyrir að þeir hafi verið í stjórn þegar hrunið skall yfir og í tvö árin þar á undan, auk þess sem þeir fóru með bankamálefnin tvö árin á undan hruninu. Þeir virðast ætla að láta það duga sem "naflaskoðun" að Björgvin fyrrum bankamálaráðherra hafi seint og um síðir ákveðið að segja af sér ráðherramennsku og afþakka biðlaunin. En svo er hann áfram í framboði eins og ekkert hafi í skorist og þá væntanlega á að treysta honum og kjósa hann þar sem hann er aftur orðinn "hreinn".

Mér finnst því ekkert að því að Sjálfstæðisflokkurinn sé að skoða sín mál og komist að eigin niðurstöðu hverju hafi verið um að kenna að málin fóru eins og þau fóru. Í því sambandi virðist sú bráðabirgðaniðurstaða sem þegar er komið að það hafi verið einstaklingar sem brugðust benda til þess að flokkurinn ætli sér að láta þá bera ábyrgð sem ábyrgð báru og ekki verið að hlífa neinum. Það væri betra að aðrir stjórnmálaflokkar hefðu hugrekki til að fara í sams konar naflaskoðun og Sjálfstæðisflokkurinn og jafnframt bjóða utanflokksmönnum að skoða þá niðurstöðu og gagnrýna. Það sýnir það bara og sannar enn einu sinni að Sjálfstæðisflokkurinn er flokkur allra landsmanna á meðan hinir virðast ætla að hafa þessi mál bara fyrir sig og helst fela eins og þeir geta aðkomu sína að þessum málum.