Endurheimt landgæða á Glerárdal að hefjast.

  Í sumar er að hefjast vinna við endurheimt landgæða á Glerárdal. Verkefnið er hluti af verkefnum sem Akureyri hefur lagt inn sem þátt í verkefninu Countdown 2010. Í því flest að velja verkefni þar sem unnið er með skipulögðum hætti að endurheimt lífræðilegs fjölbreytileika.

Svæðið sem um ræðir eru gömlu efnistökunámurnar við og neðan núverandi sorphauga. Svæðið umhverfis haugana sjálfa er líka undir en ekki er hægt að byrja á því svæði fyrr en urðun verður hætt á næsta ári. Verkefnið nær líka til þess svæðis sem notað hefur verið við tilraunajarðgerð en það verkefni hættir þegar jarðgerðarstöð Flokkunar rís á Þverá í Eyjarfjarðarsveit í lok þessa árs.

                                                    

Þegar er búið að hreinsa mikið til á svæðinu og farið er að keyra mold á svæðið. Reynt verður að móta landið þannig að það líkist sem mest náttúrulegu landslagi og stefnt er að því að sá þeim plöntum sem voru á þessu svæði áður en eyðileggingin hófst á sjötta áratug síðustu aldar. Auk þessa hefst vinna við landmótun hinummegin árinnar á svæði sem skipulagt hefur verið sem aksturíþrótta og skotsvæði. Að þessum tveimur verkefnum loknum sem ætti að verða á árinu 2010 hefur mikill sigur unnist, bæði hvað varðar umhverfi og náttúru auk þess sem þetta er verulegt innlegg í baráttuna við svifrykið.

                                                    

Ástæða þess að land á Glerárdal er jafn illa farið og raun ber vitni er vegna óhóflegrar efnistöku í gegnum árin og gengið var mjög nærri landinu sennilega vegna vanþekkingar og hugsunarleysins. Vonandi eru þeir dagar liðnir þegar verið er að tala um efnistöku. Efnið á Glerárdal var mjög gott og skýrir það væntanlega þessi miklu sár.

Myndin hér næst að ofan sýnir vel hvaða efni þetta var sem verið var að sækjast eftir. Þetta er fínn setsandur úr uppstöðulóni sem safnaðist fyrir í krika milli Glerárdalsjökulsins og Eyjafjarðarjökulsins, sennilega í lok ísaldar. Glerárjökullinn hafði hörfað en Eyjarfjarðarjökullinn lokaði mynni dalsins og vatn myndaðist. Glerá þess tíma rann þess vegna til norðurs og til sjávar á ýmsum stöðum, sennilega lengi við Krossanes. Langimelur sem hlykkjast eins og band til norðurs rétt ofan Giljahverfis er náttúrsmíð þessarar ár sem rann þarna til norðurs á sínum tíma. Botnlög þessa vatns eru mjög greinileg í námunni neðan núverandi sorphauga ef menn hafa áhuga á að kynna sér málið.

Ef menn nenna að hafa fyrir því má sjá í Eyrarlandshálsinum glögg merki þess hvar vatn rann frá jöklinum og myndaði djúpar rásir í melana sem eru jökulruðningar.. Ein þeirra og sennilega sú dýpsta hér neðantil er gilið vestan vegarins upp í Fálkafell.