Fallegra og betra Grófargil næsta sumar.

   Í sumar hefur mannlíf blómstrað í Grófagilinu sem sumir eru farnir að kalla Listagil. Aukin umsvif þar hafa skapað fallegt mannlíf og endurbygging gamla mjólkursamlagsins sem seinna varð Bögglageymsla Kea hefur bætt enn um betur. Fjörugt og skemmtilegt mannlíf hefur skapast við veitingastaðinn Friðrik V og það er gaman að sjá fólk sitja þar úti á góðviðrisdögum. Það er glæsileg viðbót við það sem fyrir var.

Þó ber nokkurn skugga á. Hraðakstur og spyrnur kraftmikilla bíla og mótorhjóla skapa slysahættu og mikinn hávaða. Það hefur verið nokkuð rætt hvað sé til ráða og hagsmunaaðilar hafa lýst áhyggjum sínum. Nýverið bárust formlegar kvartanir frá íbúum við ofanverða götuna.

Með auknum umsvifum hefur gangandi umferð aukist mikið við og á götunni því fólk á erindi milli gagnstétta og það fer ekki hjá því að maður hafi áhyggjur af því þegar fólk er að krossa götuna þar sem engar gangbrautir eru.

Skipulagsnefndin tók málið formlega fyrir og niðurstaðan var þessi bókun. 

Skipulagsnefnd tekur undir áhyggjur bréfritara um aukinn hraðaakstur um Kaupvangsstræti og aukna hávaðamengun. Til greina kæmi að leggja bráðabirgðahraðahindranir á mestu álagstímum s.s. á sumrin til þess að hægja á umferð og þar með minnka hljóðmengun.
Skipulagsnefnd vísar erindinu til framkvæmdadeildar til útfærslu í samráði við Gilfélagið og hagsmunaaðila.

Það er von mín að í vetur verið unnið að tillögum og næsta vor væri hægt að gera götuna öruggari og fallegri. Það mætti nota hraðahindranir sem fjarlægja má á haustin og mjög æskilegt væri að koma fyrir ýmiskonar skreytingum t.d. blómakössum og ýmsu því sem gerði svæðið meira aðlaðandi og jafnframt væri þeim þannig fyrir komið að þær virkuðu eins og hraðatemrandi vistgötugögn.

Nú eru starfandi í Grófargili fjöldi listamanna þannig að ég veit að það munu koma frumlegar tillögur um umgjörð götunna sem enn munu auka á fallegt umhverfi og rammar inn auðugt mannlíf.

Grófargilið er jú einn skjólsælasti staður í miðbæ Akureyrar.