Endurheimt svæða á Glerárdal.

Neðanverður Glerárdalur hefur lengi verið vettvangur efnistöku og í nokkra áratugi hefur óflokkuðu sorpi verið ekið á dalinn til urðunar og hefur það færst ofar og innar í áranna rás. Nú er von til að dalurinn fái sína fyrri reisn á næstu misserum. Það sem framundan er á svæðinu og hefur verið ákveðið.

• Námum lokað vestan ár og útivistar og tómustundasvæði komið á laggirnar. Deiliskipulag hefur verið samþykkt og fjótlega verður hafist handa við endurheimt þess svæðis.
• Sorphaugum á að loka á næsta ári og vinnsla á lífrænum úrgangi hefst í jarðgerðarstöð Moltu í byrjun næsta árs. Jarðgerð verður hætt á dalnum á næstu mánuðum.
• Landmótun er hafin á gömlu efnistökusvæðunum neðan núverandi sorphauga og hefur það verkefni verið valið sem hluti af samnorrænu verkefni sem hlotið hefur nafnið Countdown 2010. Það verkefni felur í sér að 14 sveitarfélög í Skandinavíu velja sér viðfangsefni í heimabyggð sem felur í sér endurheimt líffræðilegs fjölbreytileika. Svæðið sem um ræðir er eitt þeirra verkefna sem Akureyri valdi sér sem viðfangsefni og það verk er nú hafið.

Þegar er farið að flytja efni á svæðið og landmótunin hafin. Reynt verður eftir fremsta megni að endurheimta náttúrulegan gróður svæðisins en ekki sáð í það grasfræi eða slíku.

Þegar þessum verkefnum á Glerárdal lýkur, þeim síðustu vondandi á árinu 2010 hefur risaskref verið stigið í endurheimt land og loftgæða á Akureyri en eins og þekkt er rýkur gríðarlegur jarðvegur úr þessum svæðum yfir bæinn í suðvestanáttinni.