Námuvinnslu í Glerárhverfi að ljúka.

Í fjöldamörg ár hefur verið námavinnsla á lóð Arnarfells. Þar hefur verið unnið verðmætt efni einstakt fyrir hörku og slitþol. Oft hefur þessi vinnsla reynt á þolrif nágranna bæði vegna titrings sem var vegna sprenginga og auk þess ryks sem gjarna fauk undan hafgolu og þá mest yfir Holtahverfi. Fyrirtækið stillti sig af með magn sprengiefnis og auk þess var grjót ekki malað þegar vindátt var óhagstæð. Þannig átti það í það minnsta að vera. Nú sér fyrir endan á þessari vinnslu og styttist í að vinnsla hætti þarna. Þá verður gengið frá og svæðið tekið undir svokallaðan B-áfanga iðnaðarsvæðisins sem kallað er Nesjahverfi.

Þegar þessari vinnslu lýkur á næstu tveimur árum eru horfin starfssemi af svæðinu sem stundum velgdi bæjarbúum, einkum þeim sem búa í Holtahverfi. Auk námunnar er starfssemi bræðslunnar í Krossanesi hætt og í stað hennar mun koma öllu lyktarminni starfssemi þegar aflþynnuverksmiðjan hefur framleiðslu í árslok.

Þetta er mynd sem ég tók úr Krossanesborgum og glöggt sést hversu rykmengun frá námunni gat verið mikil þegar verið var að mala. Afleitt innlegg í svifryk í bænum.

Bókun framkvæmdaráðs frá því um miðjan júlí var svohljóðandi.

Krossanes - námuvinnsla
2008070049
Skútaberg ehf., áður Arnarfell hf., hefur til margra ára verið með samkomulag um námu- og efnisvinnslu í Krossanesi. Væntanlega fer að sjá fyrir endann á þessari námuvinnslu innan næstu tveggja ára og því nauðsynlegt að gera samkomulag við viðkomandi um það með hvaða hætti frágangi á svæðinu og skilum á námunni verði háttað.
Einnig þarf að meta hvort sækja þurfi um framkvæmdaleyfi fyrir námunni vegna nýrra náttúruverndarlaga er tóku gildi 1. júlí sl.
Framkvæmdaráð felur deildarstjóra framkvæmdadeildar að gera drög að samkomulagi við Skútaberg ehf. um frágang á námavinnslusvæðinu í Krossanesi, með hvaða hætti skilum á námunni skuli háttað og hvenær verklok skulu vera.  Ennfremur er deildarstjóra falið að skoða hvort sækja þurfi um framkvæmdaleyfi fyrir námunni vegna nýrra náttúruverndarlaga sem tóku gildi 1. júlí sl.

Athugasemdir

[Lilja Guðrún Þorvaldsdóttir, 2.8.2008 kl. 22:19]

Þetta hlýtur að verða léttir fyrir bæjarbúa, þegar starfsemin hættir. - Nógu er nú fjandans svifrykið erfitt.  

[Jón Ingi Cæsarsson, 2.8.2008 kl. 22:43]

Það er rétt.... mikill tími umhverfisnefndarinnar hefur farið í að átta sig á þeim vanda. Hann er margþættur og þetta er einn þátturinn...ásamt opnum námum ofan og vestan við bæinn og ýmsu fleiru.. Þar verður svæðum lokað og gengið frá á næstu mánuðum.... og svo kemur að stóru ástæðu svifryksins... hálkuvarnir í formi sandburðar á götur bæjarins... þar þarf að grípa til róttækra aðgerða.

[Páll Jóhannesson, 3.8.2008 kl. 20:24]

Ég fer oft þarna um og hef lengi, lengi verið pirraður út í skelfilega umgengni Arnarfells þarna sem og annarra sem þarna starfa. Vonandi sjáum við fram á betri tíð